പേജുകള്‍‌

2013, ഡിസംബർ 18, ബുധനാഴ്‌ച

ശ്രീ. കുറൂർ വാസുദേവൻ‌ നമ്പൂതിരി അവർകൾക്ക് ആദരാഞ്ജലി



                                             ശ്രീ. കുറൂർ വാസുദേവൻ‌ നമ്പൂതിരി അവർകൾ.

     ശ്രീ. കുറൂർ വാസുദേവൻ‌ നമ്പൂതിരി  അവർകൾ 12-08-1914 ന് കോട്ടയം ജില്ലയിലെ നാട്ടാശ്ശേരയിൽ, കുറൂർ ഇല്ലത്ത് ദാമോദരൻ നമ്പൂതിരിയുടെയും പാർവ്വതി അന്തർജ്ജനത്തിന്റെയും പുത്രനായി ജനിച്ചു. ഗുരുകുല സമ്പ്രദായത്തിൽ സംസ്കൃതപഠനം പൂർത്തിയാക്കി. പതിനേഴാമത്തെ വയസ്സിൽ കഥകളി അഭ്യാസം തുടങ്ങി. ശ്രീ. കുറിച്ചി കൃഷ്ണപിള്ള, ശ്രീ. കുറിച്ചി കുഞ്ഞൻ പണിക്കർ എന്നിവരുടെ കീഴിൽ തെക്കൻ ചിട്ടയും, ശ്രീ. കലാമണ്ഡലം കൃഷ്ണൻ കുട്ടിപ്പൊതുവാളുടെ കീഴിൽ വടക്കൻ ചിട്ടയും അഭ്യസിച്ചു. പത്തൊൻപതാമത്തെ വയസ്സിൽ കുമാരനല്ലൂർ ക്ഷേത്രത്തിൽ വെച്ചായിരുന്നു അരങ്ങേറ്റം. ശ്രീ. പൈങ്കുളം രാമചാക്യാരുടെ കീഴിൽ കണ്ണുസാധകവും, ശ്രീ. കൂറ്റൽപ്പള്ളി വാസുദേവൻ സോമയോജിപ്പാടിന്റെ കീഴിൽ പാഠകവും അഭ്യസിച്ചു. തിരുവനന്തപുരം കൊട്ടാരം കളിയോഗത്തിൽ ഇരുപതു വർഷത്തെ സേവനം, ഇരിങ്ങാലക്കുട ഉണ്ണായിവാര്യർ സ്മാരക കലാനിലയത്തിൽ ആറുവർഷത്തെ സേവനവും അനുഷ്ടിച്ചിട്ടുണ്ട്. കേരള കലാമണ്ഡലത്തിന്റെയും മറ്റു കലാസംഘടനകളുടെയും പുരസ്കാരങ്ങൾ നേടിയിട്ടുണ്ട്. 




ശ്രീ. പള്ളിപ്പുറം ഗോപലൻ നായർ (ദുര്യോധനൻ), ശ്രീ.കുറൂർ വാസുദേവൻ‌ നമ്പൂതിരി (ദുശാസനൻ) ബ്രഹ്മശ്രീ. മാങ്കുളം വിഷ്ണുനമ്പൂതിരി (ശ്രീകൃഷ്ണൻ).

 ഗുരു. ചെങ്ങന്നൂർ, മാങ്കുളം വിഷ്ണുനമ്പൂതിരി, കലാമണ്ഡലം കൃഷ്ണൻ നായർ, കുടമാളൂർ കരുണാകരൻ നായർ, ചമ്പക്കുളം പാച്ചുപിള്ള തുടങ്ങിയ കലാകാരന്മാരോടൊപ്പം ശ്രീ. കുറൂർ അനവധി അരങ്ങുകളിൽ കൂട്ടു വേഷം ചെയ്ത് അരങ്ങുകൾ വിജയിപ്പിച്ചിരുന്നു. ചുവന്ന താടി വേഷക്കാരനായിട്ടാണ് അദ്ദേഹത്തെ കൂടുതൽ അറിയപ്പെട്ടിരുന്നത്. കോട്ടയം ജില്ലയിലെ കളിയരങ്ങുകളിൽ രൌദ്രഭീമൻ, ഹരിശ്ചന്ദ്രചരിതത്തിൽ വിശ്വാമിത്രൻ തുടങ്ങിയ വേഷങ്ങൾ അദ്ദേഹം ചെയ്തു വിജയിപ്പിച്ചിട്ടുണ്ട്.  ചമ്പക്കുളം പാച്ചുപിള്ള, കുറൂർ വാസുദേവൻ‌ നമ്പൂതിരി എന്നിവർ ഒന്നിച്ച് അവതരിപ്പിച്ചിട്ടുള്ള ബാലി- സുഗ്രീവന്മാർ, കലി- ദ്വാപരന്മാർ എന്നിവ ഒരു കാലഘട്ടത്തിലെ ആസ്വാദകരുടെ ശ്രദ്ധപിടിച്ചു പറ്റിയിരുന്നു.  കുറൂരിന്റെ മകൻ ശ്രീ. കുറൂർ ചെറിയ വാസുദേവൻ‌ നമ്പൂതിരി പ്രസിദ്ധനായ കഥകളി ചെണ്ട വിദഗ്ദനാണ്. 

1975 -1976 കാലഘട്ടത്തിൽ ശ്രീ. അയ്മനം കൃഷ്ണക്കൈമളുടെ നേതൃത്വത്തിൽ ബ്രഹ്മശ്രീ. മാങ്കുളം വിഷ്ണു നമ്പൂതിരി, ശ്രീ. പന്തളം കേരളവർമ്മ, ശ്രീ. ചന്ദ്രമന തിരുമേനി, ശ്രീ. കുറൂർ  തിരുമേനി, ശ്രീ. മാത്തൂർ ഗോവിന്ദൻ കുട്ടി,   ശ്രീ. കലാമണ്ഡലം  ഹരിദാസ്‌ (കോട്ടയം) എന്നിവർ  അടങ്ങുന്ന ഒരു കഥകളി സംഘം മുംബയിൽ മൂന്നു കളികൾ അവതരിപ്പിക്കുവാൻ എത്തിയിരുന്നു. അവർ മുംബൈയിൽ എത്തിയത് മുതൽ അവിടെ നിന്നും പോകുന്നത് വരെ ഞാൻ അവരോടൊപ്പം ഉണ്ടായിരുന്നു. ഈ അവസരത്തിലാണ് ശ്രീ. കുറൂർ  തിരുമേനിയുമായി കൂടുതൽ സംസാരിക്കാൻ അവസരം ഉണ്ടായത്. ഓരോ വേഷവും ചെയ്യുമ്പോൾ, ഓരോ കലാകാരന്മാർ  കൂട്ടു  വേഷക്കരായി എത്തുമ്പോൾ ഉണ്ടാകുന്ന അനുഭവം അദ്ദേഹം എന്നോട് പറഞ്ഞിട്ടുള്ളത് ഞാൻ ഇന്നും ഓർക്കുന്നുണ്ട്.  എന്നോട് വളരെ നല്ല സമീപനമായിരുന്നു. പിന്നീട് ഞാൻ മുംബയിൽ നിന്നും തിരിച്ചെത്തിയ ശേഷവും പല കളിസ്ഥലങ്ങളിലും  അദ്ദേഹത്തിൻറെ ധാരാളം വേഷങ്ങൾ കണ്ടിട്ടുണ്ട്. 

ഒരിക്കൽ ഏറ്റുമാനൂരിൽ ദുര്യോധനവധം കളിക്ക് ശ്രീ. കലാമണ്ഡലം ഗോപി ആശാന്റെ ദുര്യോധനനും ശ്രീ. കുറൂരിന്റെ ദുശാസനനും ബ്രഹ്മശ്രീ. മാങ്കുളം തിരുമേനിയുടെ കൃഷ്ണനും ശ്രീ. മാത്തൂരിന്റെ പാഞ്ചാലിയുമായി ഒരു കളി നടന്നത് ഓർമ്മയിൽ ഉണ്ട്. പ്രായാധിക്ക്യം കണക്കിലെടുക്കാതെ പല കളിയരങ്ങുകളുടെ മുൻപിലും കഥകളി ആസ്വദിക്കുവനായി അദ്ദേഹം എത്തിയിരുന്നത്തിലൂടെ  അദ്ദേഹത്തിൻറെ കലായോടുള്ള സ്നേഹാദരവ് പ്രകടമായിരുന്നു. ശ്രീ. മാത്തൂർ ഗോവിന്ദൻ കുട്ടി ജ്യേഷ്ഠൻറെ സപ്തതി ആഘോഷപരിപാടികളിൽ ശ്രീ. കുറൂർ തിരുമേനിയുടെ മഹനീയ സാന്നിദ്ധ്യം ഉണ്ടായിരുന്നു എന്നതും സ്മരണീയമാണ്.
 
17-12 -2013-ന്  99-മത്തെ വയസ്സിൽ ശ്രീ. കുറൂർ വലിയ വാസുദേവൻ‌ നമ്പൂതിരി അന്തരിച്ചു. അദ്ദേഹത്തിൻറെ വേർപാടിൽ ദുഖിക്കുന്ന കലാകാരന്മാർ, കലാസ്നേഹികൾ, ബന്ധു മിത്രാദികൾ എന്നിവരോടൊപ്പം ഞാനും ദു:ഖത്തിൽ പങ്കു ചേരുന്നു. ആ കലാകാരനെ മനസാ സ്മരിച്ചുകൊണ്ട് ഒരു തുള്ളി കണ്ണീർ അഞ്ജലിയായി സമർപ്പിക്കുന്നു.
 

2013, ഡിസംബർ 6, വെള്ളിയാഴ്‌ച

ശ്രീ. ചെന്നിത്തല ചെല്ലപ്പൻ പിള്ളയുടെ 15- മത് അനുസ്മരണം -(2)

കഥകളി ആചാര്യൻ ശ്രീ. ചെന്നിത്തല ചെല്ലപ്പൻ പിള്ളയുടെ 15- മത്  അനുസ്മരണ പരിപാടികൾ  2013, നവംബർ 24-ന്    ചെന്നിത്തല മഹാത്മാ ഗേൾസ്‌ ഹൈസ്കൂൾ ആഡിറ്റോറിയത്തിൽ അവതരിപ്പിക്കുകയുണ്ടായി. രാവിലെ കൃത്യം  ഒൻപതു മണിക്ക് ചെന്നിത്തല ചെല്ലപ്പൻ പിള്ള സ്മാരക സമിതിയിലുള്ള ആചാര്യന്റെ ചിത്രത്തിനു മുൻപിൽ സമതി പ്രസിഡന്റ്  ശ്രീ. ഞാഞ്ഞൂർ  സുകുമാരൻ നായർ, ചെന്നിത്തല,  തൃപ്പെരുംതുറ ഗ്രാമപഞ്ചായത്ത് മെമ്പർ  ശ്രീ. ജി. ഹരികുമാർ, ആചാര്യന്റെ കുടുംബാംഗങ്ങൾ   മുതലായവർ  പുഷ്പാർച്ചന നടത്തി. 11: 30 മണിക്ക് മഹാത്മാ ഗേൾസ്‌ ഹൈസ്കൂൾ ആഡിറ്റോറിയത്തിൽ  വെച്ച് മലയാള കലാവേദിയുടെ നേതൃത്വത്തിൽ  കാവ്യാർച്ചന നടത്തി. കഥകളിപ്പദം, വഞ്ചിപ്പാട്ട് എന്നിവയാണ് പ്രധാനമായി കാവ്യാർച്ചയിൽ ഉൾപ്പെടുത്തിയിരുന്നത്.

 വൈകിട്ട്  മൂന്നുമുപ്പതിന് ബഹുമാനപ്പെട്ട തൊഴിൽ വകുപ്പ് സഹമന്ത്രി ശ്രീ. കൊടിക്കുന്നിൽ സുരേഷ് അവർകളെ മഹാത്മാ ഗേൾസ്‌ ഹൈസ്കൂളിന്റെ മുൻപിൽ നിന്നും ബാലികമാരുടെ താലപ്പൊലി, അലക്കിട്ട കുടകൾ, ചെണ്ടമേളം, കുഴൽവാദ്യം എന്നിവയുടെ അകമ്പടിയോടെ സ്വീകരിച്ച് സമതിയിൽ എത്തിച്ചു. അദ്ദേഹത്തിൻറെ ഫണ്ടുകൊണ്ട് നിർമ്മിച്ച സമിതി കെട്ടിടത്തിന്റെ മൂന്നാമത്തെ  നിലയുടെ ഉത്ഘാടനകർമ്മം അദ്ദേഹം സസന്തോഷം നിർവഹിച്ചു.  തുടർന്ന് സ്കൂൾ ആഡിറ്റോറിയത്തിൽ എത്തി  ഈശ്വര പ്രാർത്ഥനയും തുടർന്ന് അനുസ്മരണ സമ്മേളനവും ആരംഭിച്ചു.   ശ്രീ. ഞാഞ്ഞൂർ  സുകുമാരൻ നായരുടെ അദ്ധ്യക്ഷതയിൽ ആരംഭിച്ച അനുസ്മരണ സമ്മേളനത്തിൽ സമിതി എക്സിക്യൂട്ടീവ് അംഗം ശ്രീ. ചെന്നിത്തല ആർ. ഗോപാലകൃഷ്ണൻ നായർ സ്വാഗതം ആശംസിച്ചു. 2013- ചെന്നിത്തല ചെല്ലപ്പൻ പിള്ള സ്മാരക പുരസ്കാരം നേടാനെത്തിയ  പ്രസിദ്ധ കഥകളി നടൻ ശ്രീ. ഫാക്റ്റ് പത്മനാഭൻ അവർകളെ സമിതി എക്സിക്യൂട്ടീവ് അംഗം ശ്രീ. കെ. രഘുനാഥ് സദസ്സിന് പരിചയപ്പെടുത്തി. ശ്രീ. ഫാക്റ്റ് പത്മനാഭൻ അവർകൾ   ബഹു: മന്ത്രി ശ്രീ. കൊടിക്കുന്നിൽ സുരേഷ് അവർകളിൽ നിന്നും പുരസ്‌കാരം സ്വീകരിച്ചു കൊണ്ട് സദസ്സിനും സംഘാടകർക്കും നന്ദി പ്രകാശിപ്പിക്കുകയും അനുസ്മരണ പ്രസംഗവും  ചെയ്തു. 

                            സമിതിയിൽ അഭ്യസിച്ച കുട്ടികളുടെ ചെണ്ടമേളം 


ശ്രീ. ഫാക്റ്റ് പത്മനാഭൻ അവർകളുടെ അനുസ്മരണ പ്രസംഗം കഴിഞ്ഞ് ശ്രീമതി. കവിതാ സജീവ് (ബ്ലോക്ക് പഞ്ചായത്ത് പ്രസിഡന്റ്, മാവേലിക്കര), ശ്രീമതി ഷീജാ അനിൽ (ഗ്രാമ പഞ്ചായത്ത് പ്രസിഡന്റ്, ചെന്നിത്തല- തൃപ്പെരുന്തുറ)  ശ്രീ. ജി. ഹരികുമാർ (ചെന്നിത്തല,  തൃപ്പെരുംതുറ ഗ്രാമ പഞ്ചായത്ത് മെമ്പർ), ശ്രീ. ജി. ജയദേവ് (ഗ്രാമ പഞ്ചായത്ത് മെമ്പർ) എന്നിവർ ആശംസകൾ അർപ്പിച്ചു. ശ്രീ. അയ്യപ്പൻ നായർ (സമിതി ജോയിൻ സെക്രട്ടറി) കൃതജ്ഞത രേഖപ്പെടുത്തി. തുടർന്ന് സമതിയിൽ അഭ്യസിച്ച വിദ്യാർത്ഥിനികളുടെ ഡാൻസ് അവതരിപ്പിച്ചു. 
               ശ്രീ. ഫാക്റ്റ് പത്മനാഭൻ അവർകൾക്ക് ബഹു. മന്ത്രി കൊടിക്കുന്നിൽ 
                                       സുരേഷ് അവർകൾ പുരസ്കാരം നല്കി ആദരിക്കുന്നു.

വൈകിട്ട് ആറു മുപ്പതിന് നളചരിതം ഒന്നാം ഭാഗം അവതരിപ്പിച്ചു. ശ്രീ. കലാമണ്ഡലം കൃഷ്ണപ്രസാദ് (നളൻ), ശ്രീ. ചന്ദ്രമന നാരായണൻ നമ്പൂതിരി (നാരദൻ), അഡ്വ: ശ്രീ. മോഴൂർ രാജേന്ദ്ര ഗോപിനാഥ്‌ (ഹംസം), ശ്രീ. കലാനിലയം രവീന്ദ്രനാഥപൈ (ദമയന്തി), കലാമണ്ഡലം അരുണ്‍ (സഖി) എന്നിവർ വേഷമിട്ടു. ശ്രീ. കലാമണ്ഡലം സജീവൻ, ശ്രീ. കലാമണ്ഡലം കൃഷ്ണകുമാർ എന്നിവർ സംഗീതവും ശ്രീ. കലാഭാരതി മുരളി ചെണ്ടയും ശ്രീ. കലാഭാരതി ജയശങ്കർ മദ്ദളവും കൈകാര്യം ചെയ്തു.  എല്ലാ കലാകാരന്മാരും മികച്ച പ്രകടനം കാഴ്ച വെച്ചു.
ശ്രീ. ഏവൂർ അജികുമാർ ചുട്ടിയും ശ്രീ. പന്മന അരുണിന്റെ നേതൃത്വത്തിൽ അണിയറ പ്രവർത്തനവും കളിയുടെ വിജയത്തിന് പങ്കു വഹിച്ചു. ഏവൂർ ശ്രീകൃഷ്ണവനമാലയുടെ കോപ്പുകളാണ് കളിക്ക് ഉപയോഗിച്ചത്. 

                                                നളൻ (കലാമണ്ഡലം കൃഷ്ണപ്രസാദ്‌)

                                                               നളനും നാരദനും 
                                                                            നളൻ

                                            ഹംസം (അഡ്വ: മോഴൂർ രാജേന്ദ്രഗോപിനാഥ്‌ )


                                                ദമയന്തി  (കലാനിലയം രവീന്ദ്രനാഥപൈ)

                                                             ഹംസവും ദമയന്തിയും

മാവേലിക്കരയിൽ പ്രസിദ്ധ കലാകാരന്മാർ പങ്കെടുത്ത കർണ്ണശപഥം കഥകളി നടന്നു കൊണ്ടിരുന്ന സന്ദർഭത്തിലും മാവേലിക്കര,   ചുനക്കര എന്നിവിടങ്ങളിലെ  കഥകളി ആസ്വാദകരുടേയും facebook    സുഹൃത്തുക്കളുടെയും  സാന്നിധ്യം ചെന്നിത്തലയിൽ പ്രകടമായത് നന്ദിപൂർവ്വം സ്മരിച്ചു കൊള്ളുന്നു. 

(അനുസ്മരണ സമ്മേളനം, അവാർഡ് ദാനം, കഥകളി തുടങ്ങിയവയുടെ ഫോട്ടോകൾ ചില സാങ്കേതിക കാരണങ്ങളാൽ ലഭ്യമായിട്ടില്ല. ലഭ്യമായാൽ ഉടൻ upload ചെയ്യുന്നതാണ്‌)