പേജുകള്‍‌

2012, ഡിസംബർ 10, തിങ്കളാഴ്‌ച

ചെന്നിത്തലയില്‍ അവതരിപ്പിച്ച ബാലിവിജയം കഥകളി



 ദക്ഷിണ കേരളത്തിലെ കഥകളി കലാകാരന്മാരില്‍ പ്രമുഖനായിരുന്ന ശ്രീ. ചെന്നിത്തല ചെല്ലപ്പന്‍ പിള്ളയുടെ പതിനാലാം അനുസ്മരണത്തോട് അനുബന്ധിച്ച്  25-11-2012- ന്  വൈകിട്ട് 7-15-ന്  മഹാത്മാ ഗേള്‍സ്‌ ഹൈസ്കൂള്‍  ആഡിറ്റോറിയത്തില്‍  ശ്രീ. കല്ലൂര്‍ നീലകണ്ഠന്‍  നമ്പൂതിരിപ്പാട്  അവര്‍കള്‍ രചിച്ച ബാലിവിജയം കഥകളി അവതരിപ്പിച്ചു.  


                              ശ്രീ. തിരുവല്ല ഗോപികുട്ടന്‍ നായര്‍, ശ്രീ. പരിമണം മധു (സംഗീതം)
                                                 ശ്രീ. കലഭാരതി ജയന്‍ (മദ്ദളം).

ദേവലോകാധിപനായ ഇന്ദ്രനെ രാവണപുത്രനായ മേഘനാഥന്‍ യുദ്ധത്തില്‍ ബന്ധിച്ചു ലങ്കയില്‍ കൊണ്ടുവന്നു. ബ്രഹ്മാവിന്റെ ആജ്ഞയനുസരിച്ച് രാവണന്‍ ഇന്ദ്രനെ മോചിപ്പിച്ചു.  ഈ കാലഘട്ടത്തില്‍  ഇന്ദ്രപുരിയില്‍ എത്തിയ നാരദന്‍ ഇന്ദ്രനെ അപമാനിച്ച രാവണനെ, വാനരനും ഇന്ദ്രപുത്രനുമായ ബാലിയെകൊണ്ട് അപമാനിപ്പിക്കും എന്ന്  ഇന്ദ്രന് ഉറപ്പു നല്‍കി ആശ്വസിപ്പിച്ചു. നാരദന്‍ നേരെ കിഷ്കിന്ധയിലേക്ക് യാത്ര തിരിച്ചു. ബാലിയെ കണ്ട്‌  ഇന്ദ്രന് നല്‍കിയ ഉറപ്പിനെ അറിയിച്ചു. കലഹപ്രിയനായ നാരദന്‍ തന്റെ ഉദ്ദേശം പൂര്‍ത്തീകരിക്കുവാന്‍   രാവണനെ  സ്തുതിച്ചു  കൊണ്ട്  ലങ്കയില്‍ എത്തുന്നതാണ്   ആദ്യ  രംഗം. 

                                  രാവണന്‍ (തിരനോട്ടം): ശ്രീ. കലാമണ്ഡലം കൃഷ്ണപ്രസാദ് 

                            (രാവണനും നാരദനും) നാരദന്‍: ശ്രീ. മാത്തൂര്‍ ഗോവിന്ദന്‍ കുട്ടി 

രാവണന്‍ നാരദനെ സ്വീകരിച്ചു. അഗമനോദ്ദേശം തിരക്കി. തന്റെ പുത്രന്‍ ഇന്ദ്രനെ ബന്ധിച്ചതും പിന്നീട് ബ്രഹ്മാവ് നേരിട്ടു  വന്നു സങ്കടം പറഞ്ഞപ്പോള്‍ ഞാന്‍ മോചിപ്പിച്ചു എന്ന് അറിയിച്ചു.   ഇനി എന്നോട് നേരിട്ട് യുദ്ധം ചെയ്യാന്‍ ശക്തിയുള്ളവര്‍ ഈ ലോകത്ത് ആരെങ്കിലും ഉണ്ടോ എന്ന് ഈരേഴു ലോകവും സഞ്ചരിക്കുന്ന അങ്ങ് പറയുക എന്ന് രാവണന്‍ നാരദനോട്  ചോദിച്ചു

അങ്ങയുടെ പുത്രന്‍ ഇന്ദ്രനെ ബന്ധിച്ചത്  ഈ ലോകത്തില്‍ ആരാണ്  അറിയതെയുള്ളത്. രാവണന്‍ എന്ന് കേള്‍ക്കുമ്പോള്‍  എല്ലാ  ജീവജാലങ്ങള്‍ പോലും നടുങ്ങുന്നു എന്നും ചിന്തിച്ചു നോക്കിയാല്‍ നിസ്സാരമായ ഒരു വാര്‍ത്ത അറിയിക്കുവാന്‍ ഉണ്ടെന്നും അഹങ്കാരിയായ ബാലി എന്ന ഒരു വാനരനു  മാത്രം അങ്ങയോടു മത്സരം ഉണ്ടെന്നും, "ഒരു പുല്ലിനു സമമാണ് രാവണന്‍"  എന്നു അവന്‍ പറയുന്നു എന്നും,  വളരെ നിസ്സാരമായ ഒരു വിഷയമാണെങ്കില്‍ കൂടി ലോകം മുഴുവന്‍ ഈ വിവരം പ്രസിദ്ധമാകുന്നതിനു മുന്‍പ് അവന്റെ ശൌര്യം അടക്കണം എന്നും നാരദന്‍ രാവണനെ അറിയിക്കുന്നു.

                                                               നാരദനും രാവണനും

എനിക്ക് ഒരു പുതിയ ശതൃ ഉണ്ടായിരിക്കുന്നു എന്നറിഞ്ഞ രാവണന്‍ വാനരനായ ബാലിയെ ബന്ധിച്ചു വരുവാന്‍ ചന്ദ്രഹാസവുമെടുത്തു യാത്രയ്ക്ക് തയ്യാറാവുന്നു. ഒരു വാനരനെ  ബന്ധിക്കുവാന്‍ ചന്ദ്രഹാസവുമെടുത്തു പോകുന്നത് ലജ്ജാവഹം അല്ലേ എന്ന് നാരദന്‍ ചോദിച്ചപ്പോള്‍  ലങ്കാലക്ഷ്മിയെ ലങ്കയുടെ ചുമതല ഏല്‍പ്പിച്ച്‌ രാവണന്‍ നിരായുധനായി ബാലിയെ ബന്ധിക്കുവാനായി  നാരദനോടൊപ്പം പുറപ്പെട്ടു.  


                                                                 നാരദനും രാവണനും

                                                                    ബാലി (തിരനോട്ടം)

                                                     ബാലി: ശ്രീ. തലവടി അരവിന്ദന്‍

രണ്ടാം രംഗത്ത് എത്തുന്നത് ബാലിയാണ്. രാവണനും നാരദനും കൂടി തന്റെ സമീപത്തേക്ക് എത്തുന്നത് ബാലി മനസിലാക്കി. നാരദന്‍ തന്നെ സന്ധിച്ച്, തന്റെ പിതാവായ ഇന്ദ്രനെ രാവണപുത്രന്‍ അപമാനിച്ചതും അതിനു പകരം തന്നെ കൊണ്ട് രാവണനെ അപമാനിക്കും എന്ന് ഉറപ്പു നല്‍കിയ വിവരം സ്മരിച്ചു. രാവണന്റെ അഹങ്കാരം ശമിപ്പിക്കും എന്ന ഉറച്ച തീരുമാനത്തോടെ  ബാലി ഒന്നും അറിയാത്ത ഭാവത്തില്‍ സമുദ്ര തീരത്ത്‌ തര്‍പ്പണം  തുടങ്ങി. 

മൂന്നാം രംഗത്തില്‍ തര്‍പ്പണം ചെയ്യുന്നതില്‍  മുഴുകിയിരിക്കുന്ന ബാലിയെ നാരദന്‍ രാവണന് കാട്ടി കൊടുത്തു. ഈ രൂപം കണ്ടു ഭയപ്പെടെണ്ടതില്ല എന്നും, ബന്ധിക്കുവാന്‍ പറ്റിയ അവസരമാണ് ഇതെന്നും നമ്മെ കണ്ടാല്‍ ബാലി ഓടി രക്ഷപെടുമെന്നും അതിനാല്‍ ബാലിയുടെ പിറകില്‍ കൂടി ചെന്ന് അവന്റെ വാലിന്റെ അറ്റത്തു പിടിക്കുക എന്നും   നാരദന്‍ രാവണനോടു പറയുന്നു. ബലിയുടെ രൂപം കണ്ട്‌  ഭയാശങ്ക പൂണ്ട രാവണന്‍ ബന്ധനം  സാദ്ധ്യമാകുമോ എന്ന്  ചിന്തിക്കുകയും  ഉദ്യമത്തില്‍ നിന്നും പിന്തിരിഞ്ഞാലോ എന്നും ചിന്തിച്ചു. 
ദേവലോകവാസികള്‍  എല്ലാവരും ശ്രദ്ധിക്കുന്നു, പിന്തിരിഞ്ഞാല്‍ അപമാനമാകും എന്ന് മനസിലാക്കിയ രാവണന്‍ ബാലിയുടെ വാലിന്റെ അഗ്രത്തു പിടിക്കുന്നു. നാരദന്‍ രാവണനെ സഹായിക്കുന്ന ഭാവത്തില്‍ അഭിനയിച്ചു ബാലിയുടെ വാലില്‍ കുടുക്കുന്നു. ബാലിയില്‍ നിന്നും മോചിതനാക്കുവാന്‍ നിന്റെ കേമനായ പുത്രനെ കൂട്ടി വരാം എന്ന് അറിയിച്ചു കൊണ്ട് നാരദന്‍ സന്തോഷത്തോടെ   യാത്രയായി. 

ബാലി,  നാരദന്‍ , രാവണന്‍ 


    ബാലി, രാവണന്‍ , നാരദന്‍ 


ബാലി, രാവണന്‍ , നാരദന്‍ 

തര്‍പ്പണം കഴിഞ്ഞു കിഷ്കിന്ധയില്‍ മടങ്ങി എത്തിയ ശേഷമാണ് രാവണന്റെ ദീനരോദനം ബാലി ശ്രദ്ധിച്ചത്. രാവണനെ ബന്ധനത്തില്‍ നിന്നും ബാലി മോചിപ്പിച്ചു. ഒരു വാനരന്റെ പൃഷ്ഠ ഭാഗത്തില്‍ ശയിക്കുവാന്‍  ഇഷ്ടമുണ്ടോ എന്നും  എത്ര നാളായി എന്റെ പൃഷ്ഠ ഭാഗത്തു താമസിക്കുവാന്‍ തുടങ്ങിയിട്ട് എന്നും, ഇന്ദ്രനെ ബന്ധിച്ചവന്റെ താതനാണോ നീ, നിന്റെ  ശക്തനായ പുത്രന്‍ എവിടെ ? എന്നിങ്ങനെ ചോദിച്ചു കൊണ്ട് രാവണനെ പരിഹസിച്ചു. 

നാരദന്റെ വാക്കുകള്‍ കേട്ട്, അല്ലയോ ഇന്ദ്രപുത്രാ നിന്റെ  ശക്തി  അറിയാതെ ഞാന്‍ ചെയ്ത സാഹസത്തിനു എന്നോട്  ക്ഷമിച്ചാലും എന്ന് രാവണന്‍ ബാലിയോടു പറഞ്ഞു. 

"തന്നെ എതിര്‍ക്കുവാന്‍ ലോകത്തില്‍ ശതൃക്കള്‍ ആരും  തന്നെയില്ലെന്നു     അഹങ്കരിക്കാതെ വാഴുക"  എന്ന് ബാലി രാവണനെ ഉപദേശിക്കുകയും  ഇനി നാം എന്നും മിത്രങ്ങളാണ്  എന്ന് അറിയിക്കുകയും  അര്‍ദ്ധാസനം നല്‍കി ഉപചരിക്കുകയും ചെയ്തു. കുറച്ചു കാലം കിഷ്കിന്ധയില്‍ താമസിക്കുവാന്‍ ബാലി രാവണനോട് അഭ്യര്‍ത്ഥിക്കുന്നു. താന്‍ ലങ്കവിട്ടു വളരെ നാളുകളായെന്നും അതിനാല്‍ ലങ്കയ്ക്ക് ഉടനെ മടങ്ങണം എന്നുള്ള രാവണന്റെ അപേക്ഷയെ തുടര്‍ന്ന്  രാവണനെ ബാലി  യാത്രയാക്കുന്നതോടെ കഥ അവസാനിക്കുന്നു. 


                                                             ബാലിയും രാവണനും

വളരെ കുറഞ്ഞ സമയത്തില്‍ അവതരിപ്പിക്കേണ്ടി വരുന്ന കഥകളില്‍ വിമര്‍ശനത്തിനും വിശദമായ അഭിപ്രായത്തിനും പ്രസക്തി കുറവായിരിക്കും. കളിയെ പറ്റി വളരെ നല്ല  അഭിപ്രായമാണ് ആസ്വാദകരില്‍ നിന്നും ഉണ്ടായത്. 

 ബാലിയെ ബന്ധിക്കുവാന്‍  രാവണന്‍ ചന്ദ്രഹാസവുമെടുത്തു  പുറപ്പെടുവാന്‍ ഒരുങ്ങുമ്പോള്‍,    ചന്ദ്രഹാസത്തിന്റെ ശോഭ കണ്ട നാരദന്‍, ഒരു നിസ്സാരനായ വാനരനെ ബന്ധിക്കുവാന്‍ എന്തിനു ഈ വാള്‍ എന്നും ഈ വാളിന്റെ  പ്രഭ കണ്ടാല്‍ വാനരന്‍ ഭയന്ന് ഓടിക്കളയും എന്നും ബന്ധനം അസാദ്ധ്യമായിത്തീരും  എന്നും നാരദന്‍ അറിയിച്ചു.
 തുടര്‍ന്ന് ഈ ചന്ദ്രഹാസം എനിക്ക് ലഭിച്ച കഥ അറിയില്ലേ എന്ന് രാവണന്‍ നാരദനോട് ചോദിച്ചു. അറിയില്ല എന്ന് നാരദന്‍ ഉത്തരം പറഞ്ഞു.  എന്നാല്‍ പറയാം എന്ന് കഥ ആരംഭിച്ചു. 

( കഥയുടെ അവതരണ ചുരുക്കം:)പണ്ട്  ബ്രഹ്മദേവനെ   തപസ്സുചെയ്തു വരങ്ങള്‍ എല്ലാം വാങ്ങി സുഖമായി കഴിഞ്ഞ കാലത്ത് ഒരിക്കല്‍ വൈശ്രവണന്‍   തന്റെ  ദൂതല്‍ വശം ഒരു സന്ദേശം കൊടുത്തയച്ചു. എന്നെ   ഉപദേശിച്ചു കൊണ്ടുള്ള  ആ സന്ദേശം വായിച്ചപ്പോള്‍ എനിക്ക് വളരെ കോപം ഉണ്ടായി. ആ സന്ദേശം വലിച്ചു കീറി എറിഞ്ഞു.   ആ ദൂതനെ വധിച്ച ശേഷം ഞാന്‍  വൈശ്രവണനെ യുദ്ധത്തിനു വിളിക്കുകയും  വൈശ്രവണന്‍  ഭയന്ന്   തന്റെ മുന്‍പില്‍ പുഷ്പകവിമാനം വെച്ചിട്ട്  ഓടിയെന്നും,  മടക്കയാത്രയില്‍ പുഷ്പകവിമാനത്തിനു മാര്‍ഗ്ഗ തടസ്സം ഉണ്ടായി. അതിന്റെ കാരണം ഒരു  പര്‍വതം ആണെന്ന് മനസിലായി. ഞാന്‍ ശ്രദ്ധിച്ചപ്പോള്‍   ശിവന്റെ വാസസ്ഥലമായ   കൈലാസ പര്‍വതത്തില്‍ തട്ടി നില്‍ക്കുകയും മാര്‍ഗവിഘ്നത്തിനു ഹേതുവായ കൈലാസ പര്‍വതത്തെ രാവണന്‍ തന്റെ പത്തു കരങ്ങള്‍ കൊണ്ടും കാലുകള്‍ കൊണ്ടും ഒരു പന്തുപോലെ   അമ്മാനമാടിയപ്പോള്‍ സന്തോഷവാനായ പരമശിവന്‍ പ്രത്യക്ഷപ്പെട്ടു നല്‍കിയതാണ് ചന്ദ്രഹാസം എന്ന് രാവണന്‍ നാരദനെ അറിയിച്ചു (സമയ കുറവ് കൊണ്ട്  സംഘാടകരുടെ കൂടി അഭിപ്രായം അനുസരിച്ച്  പാര്‍വതീവിരഹം ആട്ടത്തില്‍ ഉള്‍പ്പെടുത്തിയില്ല . എങ്കിലും ആ സമയത്ത് പരമശിവനും പാര്‍വതിയും തമ്മില്‍ പ്രണയ കലഹത്തില്‍ ആയിരുന്നു എന്നും കൈലാസ പര്‍വതത്തെ   ഞാന്‍  അമ്മാനം  ആടിയപ്പോള്‍ പാര്‍വതീ ദേവി ഭയന്ന് പരമശിവനോട്  ചേര്‍ന്നു . ഇതില്‍ സന്തോഷവാനായ പരമശിവന്‍ നല്‍കിയതാണ് ചന്ദ്രഹാസം എന്ന് അവസാനിപ്പിച്ചിരുന്നെങ്കില്‍ കഥയ്ക്ക്  പൂര്‍ണ്ണത ലഭിക്കുമായിരുന്നു എന്നാണ്  എന്റെ  അഭിപ്രായം .)

പരമശിവന്‍ അങ്ങേയ്ക്ക് നല്‍കിയ ഈ അത്ഭുത ശക്തിയുള്ള  ചന്ദ്രഹാസം ആരാധിക്കേണ്ടതാണെന്നും ഒരു വനരനെ ബന്ധിക്കുവാന്‍ കൊണ്ടുപോകേണ്ടതല്ല എന്ന് നാരദന്‍ പറഞ്ഞു. നാരദന്റെ അഭിപ്രായം സ്വീകരിച്ച് രാവണന്‍ ചന്ദ്രഹാസം പൂജാമുറിയില്‍ സൂക്ഷിച്ചു യാത്രയായി.

ശ്രീ. കലാമണ്ഡലം കൃഷ്ണപ്രസാദിന്റെ രാവണന്‍ വളരെ നന്നായി. രാവണന്റെ എല്ലാ പദങ്ങളും വളരെ ഭംഗിയായും ശ്രദ്ധയോടെയും  അവതരിപ്പിച്ചു.   ഫലിതത്തിന്റെ  സാദ്ധ്യതകള്‍ പരമാവധി ഉപയോഗിച്ചു കൊണ്ടും സഹനടനോട്  വളരെ    യോജിച്ചു കൊണ്ടുമാണ്‌   ശ്രീ. മാത്തൂര്‍ ഗോവിന്ദന്‍ കുട്ടി  നാരദനെ അവതരിപ്പിച്ചത്‌. ബന്ധിതനായ രാവണനെ നാരദന്‍  വീണ്ടും  തിരിച്ചു  വന്നു ശപിക്കുകയും ബാലിയെ അനുഗ്രഹിച്ചു മടങ്ങുന്നതും വളരെ രസകരമാക്കി.     

വളരെ സമയക്കുറവിലും ബാലിയുടെ ആട്ടത്തില്‍ നാരദന്റെ  വരവ്, നാരദനെ സ്വീകരിച്ചിരുത്തല്‍ ,   കുശലാന്വേഷണം,    രാവണപുത്രന്‍ തന്റെ പിതാവായ ഇന്ദ്രനെ  ബന്ധിച്ച് അപമാനിതനാക്കിയതു നാരദനില്‍   നിന്നും മനസിലാക്കുന്നതും, സമുദ്രക്കരയിലേക്ക് നീ തര്‍പ്പണം ചെയ്യാന്‍ പോകൂ, ഞാന്‍ രാവണനെ അവിടേക്ക് കൂട്ടി വരാം  എന്നുള്ള നാരദന്റെ നിര്‍ദ്ദേശം, നാരദനിര്‍ദ്ദേശം  അനുസരിച്ച് സമുദ്രക്കരയിലേക്കുള്ള  പുറപ്പെടല്‍  എന്നിവ അവതരിപ്പിച്ചു.  വളരെ ചടുലതയോടെയോടെയുള്ള ബാലിയുടെ  അവതരണമാണ്  ശ്രീ. തലവടി അരവിന്ദന്‍ ചെയ്തത്. 

ശ്രീ. തിരുവല്ല ഗോപികുട്ടന്‍ നായരും ശ്രീ. പരിമണം മധുവും ചേര്‍ന്ന് സംഗീതവും ശ്രീ. കലഭാരതി ഉണ്ണികൃഷ്ണനും  ശ്രീ. കലഭാരതി ജയനും യഥാക്രമം ചെണ്ടയും മദ്ദളവും കൈകാര്യം ചെയ്തു. ശ്രീ. ഏവൂര്‍ അജിയാണ് ചുട്ടി കൈകാര്യം ചെയ്തത്. തിരുവല്ലാ ശ്രീവൈഷ്ണവം കഥകളിയോഗത്തിന്റെ കഥകളി കോപ്പുകളും അണിയറ ശില്‍പ്പികളും കളിയുടെ വിജയത്തിന് പ്രധാന പങ്കു വഹിച്ചു.
 ********************************************************************************  *അണിയറ വിശേഷങ്ങള്‍*
അണിയറയില്‍ ശ്രീ. തോന്നയ്ക്കല്‍ പീതാംബരന്‍, ശ്രീ. മാത്തൂര്‍ ഗോവിന്ദന്‍ കുട്ടി, ശ്രീ. തിരുവല്ല ഗോപികുട്ടന്‍ നായര്‍, ശ്രീ. തലവടി അരവിന്ദന്‍  എന്നിവര്‍ സംസാരിച്ചു കൊണ്ടിരുന്നു. പരിപാടിയുടെ തിരക്കിനിടയിലും  ഇവരുടെ സംഭാഷണം ശ്രദ്ധിക്കുവാന്‍ ഇടയ്ക്കിടെ സമയം കണ്ടെത്തിയിരുന്നു. കലാജീവിതത്തിലെ അവരുടെ അനുഭവങ്ങള്‍ തന്നെയായിരുന്നു ചര്‍ച്ചാ വിഷയം. 
ശ്രീ. തിരുവല്ലാ ഗോപികുട്ടന്‍ നായര്‍ പങ്കുവെച്ച ഒരു അനുഭവം : ശ്രീ. കലാമണ്ഡലം കൃഷ്ണന്‍ നായര്‍ ആശാന്റെ സാന്നിധ്യം  ദക്ഷിണ കേരളത്തിലെ  കളിയരങ്ങുകളില്‍ പ്രബലമായി നിന്നിരുന്ന കാലത്ത് ഒരു അണിയറയില്‍ കൃഷ്ണന്‍ നായര്‍ ആശാന്‍ പരശുരാമന്റെ വേഷം തീര്‍ന്നു അരങ്ങിലേക്ക് പോകും മുന്‍പ് അണിയറ വിളക്കിന് മുന്‍പില്‍ തൊഴുതു നില്‍ക്കുമ്പോള്‍ അണിയറയില്‍ വേഷം തേച്ചു കൊണ്ടിരുന്ന  ചെങ്ങന്നൂര്‍ ആശാന്‍ തന്റെ അടുത്തിരുന്ന ശിഷ്യന്‍ ചെന്നിത്തലയോട്  "ചെല്ലപ്പാ, കൃഷ്ണന്‍ നായരുടെ പരശുരാമന്റെ  വേഷം കണ്ടിട്ട് നിനക്ക് എന്ത് തോന്നുന്നു" എന്ന് ചോദിച്ചു. ശിഷ്യന് ആശാന്റെ ചോദ്യത്തിന്റെ പൊരുള്‍ മനസിലാകാതെ ആശാന്റെ മുഖത്തേക്ക് നോക്കിയിരുന്നു. 

ശിഷ്യന്‍ മറുപടി ഒന്നും പറഞ്ഞില്ല. ആശാന്‍ ഒരു നിമിഷം ശിഷ്യന്റെ മുഖം ശ്രദ്ധിച്ചിട്ട്  "എനിക്ക്  ആ രാമനെ ഒന്ന് നമസ്കരിക്കണം എന്ന് തോന്നുന്നു"  എന്ന് പറഞ്ഞത്രേ!.
                                                 ***
                                                

2012, ഡിസംബർ 7, വെള്ളിയാഴ്‌ച

ശ്രീ. ചെന്നിത്തല ചെല്ലപ്പന്‍പിള്ള അനുസ്മരണം -2012



ദക്ഷിണ കേരളത്തിലെ കഥകളി കലാകാരന്മാരില്‍ പ്രമുഖനായിരുന്ന ശ്രീ. ചെന്നിത്തല ചെല്ലപ്പന്‍പിള്ളയുടെ പതിനാലാമതു   അനുസ്മരണം 25-11-2012 നു ഉച്ചയ്ക്ക് ഒരു മണിയോടെ ആരംഭിച്ചു. കാലത്ത് ഒന്‍പതു മണിക്ക് ശ്രീ. ചെല്ലപ്പന്‍പിള്ളയുടെ സ്മൃതി മണ്ഡപത്തില്‍ പുഷ്പാര്‍ച്ചന ചെയ്തു. 1:30-നു മലയാള കലാവേദിയുടെ നേതൃത്വത്തില്‍  കാവ്യാര്‍ച്ചന നടത്തി. തുടര്‍ന്ന്  ശ്രീ. ആര്‍. ആര്‍. സി. വര്‍മ്മ അവര്‍കളുടെ  (മാവേലിക്കര  കഥകളി ആസ്വാദക സംഘം)   കഥകളി ആസ്വാദന ക്ലാസും ശ്രീ. ചെന്നിത്തല രഘുനാഥന്‍ നായരുടെ നേതൃത്വത്തില്‍ കഥകളി ക്വിസ് മത്സരവും നടന്നു. 

നാലരമണിക്ക്  ശ്രീ. പി.സി. വിഷ്ണുനാഥ്‌ (MLA) വിളക്കു  തെളിച്ച് അനുസ്മരണ സമ്മേളനം ഉത്ഘാടനം ചെയ്തു. സമിതി വിദ്യാര്‍ത്ഥിനികളുടെ  ഈശ്വര പ്രാര്‍ത്ഥന നടത്തി. സമിതി പ്രസിഡന്റ് ഡോക്ടര്‍. വി. ആര്‍. കൃഷ്ണന്‍നായര്‍ അവര്‍കള്‍ അദ്ധ്യക്ഷത വഹിക്കുകയും  സമിതിവൈസ് പ്രസിഡന്റ് ശ്രീ. ഞാഞ്ഞൂര്‍ സുകുമാരന്‍ നായര്‍ അവര്‍കള്‍ സ്വാഗതം പറയുകയും ചെയ്തു. ശ്രീ. ചെന്നിത്തല ഗോപാലകൃഷ്ണന്‍ നായര്‍ അവര്‍കള്‍ (സമിതി എക്സിക്യൂട്ടീവ് അംഗം)  ശ്രീ. ചെന്നിത്തല ചെല്ലപ്പന്‍ പിള്ള  പുരസ്കാരം-2012-നു  അര്‍ഹനായ പ്രശസ്ത കഥകളി കലാകാരന്‍ ശ്രീ. തോന്നയ്ക്കല്‍ പീതാംബരന്‍ അവര്‍കളെ സദസ്സിനു പരിചയപ്പെടുത്തുകയും അദ്ദേഹത്തിന്  പുരസ്‌കാരം നല്‍കി  ആദരിക്കുകയും ചെയ്തു. ശ്രീ. തോന്നയ്ക്കല്‍ പീതാംബരന്‍ അവര്‍കളുടെ  മറുപടി പ്രസംഗത്തില്‍ അദ്ദേഹത്തിന്‍റെ വളര്‍ച്ചയില്‍ ശ്രീ. ചെന്നിത്തല ചെല്ലപ്പന്‍ പിള്ള അവര്‍കള്‍ക്കുണ്ടായിരുന്ന പങ്കിനെ സ്മരിച്ചു. 

                                       മറുപടി പ്രസംഗം : ശ്രീ.തോന്നയ്ക്കല്‍ പീതാംബരന്‍

(ശ്രീ.തോന്നയ്ക്കല്‍ പീതാംബരന്‍ അവര്‍കളുടെ  മറുപടി പ്രസംഗത്തില്‍ നിന്ന്: എന്റെ  അറുപതു വര്‍ഷത്തെ കഥകളി ജീവിതത്തില്‍ ,അതായത് പുറപ്പാടു കെട്ടി നടന്ന കാലം മുതലുള്ള കാലഘട്ടത്തില്‍ നിന്നും  കഴിഞ്ഞ പതിനാലു വര്‍ഷം കുറച്ചു നോക്കിയാല്‍ ശ്രീ. ചെന്നിത്തല ചേട്ടനോടൊപ്പം വര്‍ഷം തോറും  ഏകദേശം  അറുപത്തോളം കളികള്‍ക്ക് ഒന്നിച്ചു കൂടുവാന്‍  അവസരം ലഭിച്ചിരുന്നു. അദ്ദേഹത്തിന്‍റെ കൂടെ ധാരാളം കൂട്ടുവേഷങ്ങള്‍ ചെയ്യാന്‍ കിട്ടിയ അവസരങ്ങള്‍ എല്ലാം ഒരു ഭാഗ്യമായി ഞാന്‍ കരുതുന്നു
  തന്റെ കൂടെ സഹകരിക്കുന്ന സഹപ്രവര്‍ത്തകരായ, വളര്‍ന്നു വരുന്ന കലാകാരന്മാര്‍ , അത് വേഷക്കരായാലും ഗായകരായാലും മേളക്കാരായാലും അവരെ പ്രോത്സാഹിപ്പിക്കുന്നത്തിലും,    ഗുരുക്കന്മാരെ സ്നേഹിക്കുന്നതിലും  ബഹുമാനിക്കുന്നതിലും ചേട്ടന്‍ കാണിച്ചിട്ടുള്ള നിഷ്കര്‍ഷത മറക്കാനാവാത്തതാണ്.   

ഞാന്‍ ഇന്ന് ഈ വേദിയില്‍ നില്‍ക്കുവാന്‍ എന്റെ ചെല്ലപ്പന്‍പിള്ള ചേട്ടനും ഒരു മുഖ്യ കാരണക്കാരന്‍ തന്നെയാണ്. ഞാന്‍ കാരേറ്റ് ഗംഗാധരന്‍ പിള്ള ആശാന്റെ കളിയോഗത്തില്‍ കഥകളി പഠിച്ച് അരങ്ങേറ്റം കഴിഞ്ഞ് അരങ്ങത്തു പ്രവര്‍ത്തിച്ചു വന്ന കാലഘട്ടത്തില്‍  ചെറിയഴീക്കല്‍ ദാമോദരപണിക്കര്‍ (ചെണ്ട), നന്ദാവനം കൃഷ്ണപിള്ള (മദ്ദളം), തിരുവല്ല സി.ആര്‍. ഉദയവര്‍മ്മ( സംഗീതം) എന്നിവരും  ചെല്ലപ്പന്‍ പിള്ള ചേട്ടനും ഞാനും ഉള്‍പ്പെടുന്ന ഒരു ഫോട്ടോ എടുത്തിരുന്നു.  പലപ്പോഴും ചേട്ടന്‍ എന്നോട് സംസാരിക്കുമ്പോള്‍ എടാ, ആ ഫോട്ടോ കണ്ടു പലരും പീതാംബരന്‍ തന്റെ സഹോദരനാണോ  എന്ന് ചോദിച്ചതായി പറഞ്ഞിട്ടുണ്ട്.  ഒരു സഹോദരന്‍ എന്ന നിലയില്‍തന്നെ  അദ്ദേഹം എന്നോട് പെരുമാറിയിരുന്നു എന്നതിന് ധാരാളം കഥകള്‍ എനിക്ക് പറയുവാന്‍ ഉണ്ട്. അതെല്ലാം ഇവിടെ പറയുവാനുള്ള സമയം ഇല്ല. എങ്കിലും അതിനു ഒരു  സന്ദര്‍ഭം ഇനി ഉണ്ടാകുമോ എന്ന് പറയുവാന്‍ സാധിക്കാത്ത കാരണത്താല്‍ ഞാന്‍ ഒരു അനുഭവം നിങ്ങളോട് പങ്കുവെയ്ക്കുകയാണ്.   

കൊട്ടാരക്കരയില്‍ ഒരു കളിക്ക് എനിക്ക് നിഴല്‍ക്കുത്തിലെ ദുര്യോധനന്‍ ആണ് നിശ്ചയിച്ച വേഷം. അക്കാലത്ത്  നിഴല്‍കുത്ത്  കഥ നിശ്ചയിച്ചാല്‍ ചെങ്ങന്നൂര്‍ ആശാന്റെയോ ഹരിപ്പാട്ടു രാമകൃഷ്ണപിള്ള ചേട്ടന്റെയോ  ദുര്യോധനന്‍, മങ്കൊമ്പ് ശിവശങ്കരചേട്ടന്റെ മലയത്തി, ചെന്നിത്തല ചേട്ടന്റെ മന്ത്രവാദി എന്നിങ്ങനെയാവും വേഷങ്ങള്‍. ആരുടെ വേഷത്തിന്    മാറ്റം ഉണ്ടായാലും ചേട്ടന്റെ മന്ത്രവാദിയുടെ  വേഷത്തിന് മാറ്റം ഉണ്ടായിരുന്നില്ല. ഒരുതരത്തില്‍ പറഞ്ഞാല്‍ ഇവര്‍ക്ക് വേണ്ടി എഴുതപ്പെട്ട കഥ നിഴല്‍കുത്ത് എന്ന് പറയപ്പെട്ടിരുന്ന അക്കാലത്ത് എനിക്ക് നിഴല്‍കുത്തിലെ ദുര്യോധനന്‍ നിശ്ചയിച്ചപ്പോള്‍ ഞാന്‍ വേഷം കെട്ടുവാന്‍ മടിച്ചു. ചെങ്ങന്നൂര്‍ ആശാന്റെയും ഹരിപ്പാട്  രാമകൃഷ്ണപിള്ള ചേട്ടന്റെയും ദുര്യോധനന്റെ കൂടെ മന്ത്രവാദി കെട്ടി വരുന്ന ചേട്ടന്റെ കൂടെ എനിക്കു വേഷം ചെയ്യാന്‍ ഒരു ഭയം ഉണ്ടെന്നു മാത്രമല്ല എന്റെ കൂടെ വേഷം കെട്ടി ചേട്ടന്റെ മന്ത്രവാദി മോശമായി എന്ന ദുഷ്പേരും ഉണ്ടാകരുതെന്ന് ഞാന്‍ കരുതി.  വിവരം കളിയോഗം മാനേജരും ഉത്സവ കമ്മിറ്റിക്കാരും അറിഞ്ഞു.  എന്റെ തീരുമാനത്തില്‍ മാറ്റം ഇല്ലെന്നു ഉറപ്പു പറഞ്ഞപ്പോള്‍ കളിയോഗം മാനേജരും ചെല്ലപ്പന്‍ ചേട്ടനും കൂടി എന്റെ സമീപം എത്തി .  എടോ തനിക്കു ദുര്യോധനന്‍ കെട്ടാന്‍ എന്താണ് വൈഷമ്മ്യം? തനിക്കു അറിയാവുന്നത് താന്‍ ചെയ്യുക, എന്ത് പ്രശ്നം ഉണ്ടായാലും അത് ഞാന്‍ പരിഹരിച്ചു കൊള്ളാം എന്ന് ചേട്ടന്‍ ഉറപ്പു നല്‍കിയിട്ടും എനിക്ക് ധൈര്യം ഉണ്ടായില്ല.  ഒടുവില്‍ ഇന്ന് നീ ദുര്യോധനന്‍ ചെയ്യുന്നില്ലെങ്കില്‍ ഇനി ഞാന്‍ മന്ത്രവാദി വേഷം ചെയ്യില്ല എന്ന്  ചേട്ടന്‍ ഉറക്കെ പ്രാഖ്യാപിച്ചപ്പോള്‍ ഞാന്‍ മനസില്ലാ മനസോടെ ദുര്യോധനന്‍ ചെയ്തു. ചേട്ടന്‍ തന്ന ആത്മബലവും ചെങ്ങന്നൂര്‍ ആശാനും ഹരിപ്പാട്ടു രാമകൃഷ്ണപിള്ള ചേട്ടനും പ്രസ്തുത വേഷം ചെയ്തു കണ്ട അനുഭവവും വെച്ചു കൊണ്ടാണ്  അന്ന് ഞാന്‍ അരങ്ങില്‍ പ്രവര്‍ത്തിച്ചത്
കളി  കഴിഞ്ഞപ്പോള്‍   ചേട്ടന്‍ എന്നെ അഭിനന്ദിക്കുകയും ചെയ്തു  പിന്നീട്  ചേട്ടന്റെ താല്‍പ്പര്യത്തോടെ  ഞങ്ങള്‍ ധാരാളം  അരങ്ങുകളില്‍ ദുര്യോധനനും മന്ത്രവാദിയുമായി  ഒന്നിച്ചിട്ടുണ്ട്.  അന്നത്തെ മന്ത്രവാദിയുടെ അനുഗ്രഹം ഒന്നു മാത്രമാണ് എന്നെ ഈ നിലയില്‍ എത്തിച്ചത് എന്നു ഞാന്‍ വിശ്വസിക്കുന്നു. 
ചേട്ടന്റെ ആദ്യ സ്മരണാ ദിനത്തിന് ഇവിടെ അവതരിപ്പിച്ച കര്‍ണ്ണശപഥം കഥകളിയില്‍ കര്‍ണ്ണന്റെ വേഷം ചെയ്യുവാന്‍ ലഭിച്ച അവസരവും ഒരു ഭാഗ്യമായി കരുതുന്നു. ചെല്ലപ്പന്‍ പിള്ള ചേട്ടന്റെ നാമധേയത്തില്‍ എനിക്ക് ഒരു പുരസ്കാരം നല്‍കിയ സമതി അംഗങ്ങള്‍ക്കും, ഈ നാട്ടുകാര്‍ക്കും , ചേട്ടന്റെ കുടുംബാംഗങ്ങള്‍ക്കും ഈ എളിയ കലാകാരന്റെ നന്ദിയും കടപ്പാടും അറിയിച്ചു കൊള്ളുന്നു)


കഥകളി ക്വിസ് മത്സരത്തില്‍ ഒന്നാം സ്ഥാനം കരസ്ഥമാക്കിയ ചെന്നിത്തല മഹാത്മാ ഗേള്‍സ്‌ ഹൈസ്കൂളിലെ (9th std) വിദ്യാര്‍ത്ഥിനി ഊര്‍മ്മിളയ്ക്കും രണ്ടാം സ്ഥാനം കരസ്ഥമാക്കിയ  മഹാത്മാ ബോയിസ് ഹൈസ്കൂള്‍ (9th std) വിദ്യാര്‍ത്ഥി രാമഭദ്രനും 
മൂന്നാം സ്ഥാനം കരസ്ഥമാക്കിയ  മഹാത്മാ ഗേള്‍സ്‌ ഹൈസ്കൂള്‍   (9th std)  വിദ്യാര്‍ത്ഥിനി മേഘയ്ക്കും   പാരിതോഷികം നല്‍കി അഭിനന്ദിച്ചു. 

                                                                   ഈശ്വര പ്രാര്‍ത്ഥന



               ശ്രീ. ഞാഞ്ഞൂര്‍ സുകുമാരന്‍ നായര്‍ അവര്‍കള്‍ അനുസ്മരണ ഗീതം പാടുന്നു. 

                           അനുസ്മരണ സമ്മേളനം ശ്രീ.പി. സി. വിഷ്ണുനാഥ് അവര്‍കള്‍ (MLA ) 
                                          വിളക്ക് കൊളുത്തി ഉത്ഘാടനം ചെയ്യുന്നു.


                  ഡോക്ടര്‍. വി. ആര്‍. കൃഷ്ണന്‍ നായര്‍ സദസ്സിനെ അതിസംബോധന ചെയ്യുന്നു. 


       
 പുരസ്കാര ജേതാവ് ശ്രീ. തോന്നയ്ക്കല്‍ പീതാംബരന്‍     അവര്‍കളെ ശ്രീ. ചെന്നിത്തല 
            ആര്‍. ഗോപാലകൃഷ്ണന്‍ നായര്‍ അവര്‍കള്‍ സദസ്സിനു പരിചയപ്പെടുത്തുന്നു.

 കഥകളി ക്വിസ് മത്സരത്തില്‍ ഒന്നാം സമ്മാനം  ചെന്നിത്തല മഹാത്മാ ഗേള്‍സ്‌ ഹൈസ്കൂള്‍
    9th std . വിദ്യാര്‍ത്ഥിനി. ഊര്‍മ്മിളയ്ക്ക് ശ്രീ. തോന്നയ്ക്കല്‍ പീതാംബരന്‍ സമ്മാനം നല്‍കുന്നു.



      കഥകളി ക്വിസ് മത്സരത്തില്‍ രണ്ടാം സമ്മാനം കരസ്ഥമാക്കിയ  മഹാത്മാ ബോയിസ് 
 ഹൈസ്കൂള്‍ 9th std . വിദ്യാര്‍ത്ഥി ശ്രീ.എ. രാമഭദ്രന് ശ്രീമതി. കവിതാ സജീവ് സമ്മാനം നല്‍കുന്നു.


കഥകളി ക്വിസ് മത്സരത്തില്‍ മൂന്നാം സമ്മാനം കരസ്ഥമാക്കിയ ചെന്നിത്തല മഹാത്മാ 
          ഗേള്‍സ്‌ ഹൈസ്കൂള്‍  9th std . വിദ്യാര്‍ത്ഥിനി.ശ്രീ. മേഘ MB യ്ക്കുള്ള സമ്മാനം 
        ശ്രീമതി. ഷീല അനില്‍ അവര്‍കളില്‍ നിന്നും ശ്രീ. ഊര്‍മ്മിള.S. സ്വീകരിക്കുന്നു.


                
                                       ശ്രീ. ജി. ഹരികുമാര്‍  ആശംസാ പ്രസംഗം ചെയ്യുന്നു. 



                      ശ്രീ. എന്‍. വിശ്വനാഥന്‍ നായര്‍ കൃതജ്ഞത രേഖപ്പെടുത്തുന്നു.
 
ശ്രീമതി. കവിതാസജീവ് ( മാവേലിക്കര ബ്ലോക്ക് പഞ്ചായത്ത് പ്രസിഡന്റ് ), ശ്രീമതി. ഷീജാഅനില്‍ (ചെന്നിത്തല ഗ്രാമ പഞ്ചായത്തു പ്രസിഡന്റ് ), ശ്രീ. ജി. ഹരികുമാര്‍ (ചെന്നിത്തല ഗ്രാമ പഞ്ചായത്തു മെമ്പര്‍) എന്നിവര്‍ ആശംസാ പ്രസംഗം നടത്തി. സമിതി സെക്രട്ടറി ശ്രീ. എന്‍. വിശ്വനാഥന്‍ നായര്‍ കൃതജ്ഞത രേഖപ്പെടുത്തി. 
   
തുടര്‍ന്ന് ശ്രീ. ചെന്നിത്തല ചെല്ലപ്പന്‍ പിള്ള സ്മാരക കലാ സാംസ്കാരിക സമിതിയില്‍  അഭ്യസിച്ച കുട്ടികളുടെ ചെണ്ടവാദ്യവും, നൃത്തപരിപാടികളും  അവതരിപ്പിച്ചു.  കൃത്യം 19:15-ന് ബാലിവിജയം കഥകളി തുടങ്ങി. 

                                              ( കഥകളിയുടെ വിവരങ്ങള്‍ അടുത്ത പോസ്റ്റില്‍ )  

2012, നവംബർ 21, ബുധനാഴ്‌ച

കാര്‍ത്തികതിരുനാളും അശ്വതിതിരുനാളും (ഭാഗം -5)



                      (ശ്രീ. എം. കെ. കെ. നായരുടെ ലേഖനം അവസാന ഭാഗം)

കാര്‍ത്തികതിരുനാളിന്റെ വിശിഷ്ടകൃതിയായ ബാലരാമഭാരതം നാട്യശാസ്ത്ര  ഗ്രന്ഥങ്ങളുടെ കൂട്ടത്തില്‍ ഏറ്റവും പ്രാധാന്യം അര്‍ഹിക്കുന്ന ഒന്നാണ്.  40- അസംയുതങ്ങളും  27 -സംയുതങ്ങളും ഉള്‍പ്പെട്ട  57-മുദ്രകള്‍ അതില്‍ പ്രതിപാദിച്ചിട്ടുണ്ട്. ആ മുദ്രകള്‍ കഥകളിക്കു  ഉപയോഗ പ്രദമാകണമെന്ന്  അദ്ദേഹം ആഗ്രഹിച്ചിരുന്നു എങ്കിലും അതിനു മുന്‍പുതന്നെ  ഹസ്തലക്ഷണ ദീപിക പ്രചാരത്തില്‍ വന്നു കഴിഞ്ഞതിനാല്‍ ആ ആഗ്രഹം സഫലമായില്ല. 

അശ്വതി തിരുനാള്‍ രാജകുമാരന്‍ 1856 -ല്‍ ജനിച്ചു. തന്റെ മുപ്പത്തി എട്ടാമത്തെ വയസ്സില്‍ (1894) മൂപ്പേല്‍ക്കാതെ അദ്ദേഹം മരിച്ചു. എന്നാല്‍ ഈ ചെറിയ കാലം കൊണ്ട് ആട്ടക്കഥാ രംഗത്ത് ഉണ്ണായിവാര്യരെ പോലെ തന്നെ പേര് അദ്ദേഹം സമ്പാദിച്ചു. അസാമാന്യ ദൃശ്യനെന്ന പണ്ഡിതനും വാസനാ കവിയുമായി രുന്ന അദ്ദേഹത്തിന്‍റെ കൃതികള്‍ 'പാടി രസിക്കുവാന്‍ പാട്ടുകാര്‍ക്കും അഭിനയിച്ചു ഫലിപ്പിക്കുവാന്‍ നടന്മാര്‍
ക്കും  കണ്ടും ചിന്തിച്ചും ആസ്വദിക്കുവാന്‍ പ്രേക്ഷകര്‍ക്കും വകനല്‍കുന്ന' ഉത്തമ സാഹിത്യമാണ് . രുഗ്മിണീസ്വയംവരം, അംബരീക്ഷ ചരിതം, പൂതനാമോക്ഷം , പൌണ്ട്രകവധം എന്നിവയാണ് അശ്വതിയുടെ കൃതികള്‍ . അശ്വതിയെ പറ്റി പ്രൊഫ. എന്‍. കൃഷ്ണപിള്ള  പറയുന്നത്  ഇപ്രകാരമാണ്.

 ' കരുതിക്കൂട്ടി തിരഞ്ഞെടുത്ത സുന്ദര ശബ്ദങ്ങളെ പാലും പഞ്ചസാരയും  എന്നപോലെ ഇണക്കിച്ചേര്‍ത്തു, രമണീയാര്‍ത്ഥങ്ങളുടെ ലോകത്തിലേക്ക്‌ അനുവാചകരെ ആനയിക്കുവാന്‍ കെല്‍പ്പുണ്ടായിരുന്ന ഒരു വിദഗ്ദശില്‍പ്പിയും  ഉന്നത കലാകാരനുമായിരുന്നു  അശ്വതി തിരുനാള്‍'. ചൈതന്യ പൂര്‍ണ്ണമായ ഒരു അന്തരീക്ഷം അശ്വതി തിരുനാളിന്റെ  കഥകളില്‍ ആദ്യന്തം കാണാം. അദ്ദേഹത്തിന്റെ കഥകള്‍ എല്ലാം തന്നെ പ്രചുര പ്രചാരം സിദ്ധിച്ചിട്ടുള്ളവയാണ്. അവയിലെ ഗാനങ്ങളും സംഗീത രസികന്മാരുടെ നാവിന്‍ തുമ്പത്ത്  ഇന്നും തത്തിക്കളിക്കുന്നുണ്ട്. കഥകളി പാട്ടുകാരും കഥകളി നടന്മാരും അശ്വതിയുടെ കഥകള്‍ പ്രദര്‍ശിപ്പിക്കുവാന്‍ പ്രത്യേകം കൌതുകമുള്ളവരാണ്. അവരുടെ കഴിവിന്റെ പരമസീമകള്‍ പ്രകാശിപ്പിക്കാന്‍ പര്യാപ്തമായ വിധത്തില്‍ ആ കൃതികള്‍ നിര്‍മ്മിച്ചിരുന്നു എന്നതാണ് ഈ അഭിനിവേശത്തിനു കാരണം. മാതുലനായ കാര്‍ത്തിക തിരുനാള്‍ മഹാഭാരതത്തില്‍ നിന്നും ഇതിവൃത്തങ്ങള്‍ ആദാനം ചെയ്തു. അനന്തരവനായ അശ്വതിയാകട്ടെ ഭാഗവതത്തെ ആശ്രയിച്ച് കഥാരചന നടത്തി.
                                            
                                            അശ്വതി തിരുനാള്‍ 


ആട്ടക്കഥകള്‍ കൂടാതെ അശ്വതി രചിച്ച മറ്റു കൃതികള്‍ അധികവും സംസ്കൃതത്തിലാണ്. അവ വഞ്ചീശസ്തവം, കാര്‍ത്തവീര്യവിജയം , സന്താനഗോപാലം എന്ന മൂന്നു പ്രബന്ധങ്ങളും  ശ്രുംഗാര- സുധാകരംഭാണവും  രുഗ്മിണീപരിണയം  നാടകവും ദശാവതാര ദണ്ഡകവുമാണ്. രുഗ്മിണീപരിണയമാണത്രെ ഇവയില്‍ സര്‍വ്വപ്രധാനമായത്.  കൂടാതെ അശ്വതി ശ്രീപത്മനാഭ   കീര്‍ത്തനവും രചിച്ചിട്ടുണ്ട്. പ്രസന്ന പ്രൌഡമധുരമാണ് അശ്വതിയുടെ കാവ്യശൈലി.  

'ചന്ദ്രമുഖിമാരേ കാണ്‍ക ' ' കരുണാലയവീര' ' മാധവസമയമിദം' 'പ്രാണനായക ശ്രുണുവചനം' 'ആരതാരിതസാധാരണമനുജന്മാര്‍'  'കനകരുചി രുചിരാംഗിമാരേ' 'എന്തഹോ ഭൂസുരന്മാരേ' ഇത്യാദി പദങ്ങള്‍ അനശ്വര മധുരങ്ങളാണ്. ' ഈരേഴുപാരിലൊരു വേരായി മേവിന' എന്ന ദണ്ഡകവും  ' ചഞ്ചലാക്ഷിമാരണിയും മൌലിമാലാ  വന്നു' എന്നാ വരിയും മറ്റും ആട്ടക്കഥാ സാഹിത്യത്തിലെ അപൂര്‍വരത്നങ്ങളാണ്. 

സംസ്കൃതം ഇത്രയും അനായാസമായും സ്വാരസ്യപൂര്‍ണ്ണമായും ആട്ടക്കഥകളില്‍ മറ്റൊരു കവിയും കൈകാര്യം ചെയ്തിട്ടില്ല എന്നു പറയാവുന്നതാണ്. ഇക്കാര്യത്തില്‍ അനന്ന്യ പ്രഭാവനായ കോട്ടയത്തു തമ്പുരാനെയും അശ്വതി കവച്ചുവെച്ചിട്ടുണ്ടെന്നതില്‍ സംശയം ഇല്ല. പൂതനാമോക്ഷം, അംബരീചരിതം, രുഗ്മിണീസ്വയംവരം എന്ന കഥകള്‍ അരങ്ങുകള്‍  തകര്‍ക്കുന്ന കാലത്ത് സദസ്യരില്‍ ഉണ്ടായിരുന്ന ഒരു നാരദന്‍ യാദൃശ്ചികമെന്ന വിധം അശ്വതിയോട് പറഞ്ഞുവത്രേ, "പരമ സുന്ദരമായ ഈ കഥകള്‍ അവിടുന്നു രചിച്ചുവെങ്കിലും അവയ്ക്ക് കോട്ടയം കഥകളുടെ പ്രൌഡി ഇല്ലല്ലോ. ശ്രോതാക്കളെ പിടിച്ചു കെട്ടുന്ന ആ സംസ്കൃത വ്യുല്‍പ്പത്തി വടക്കര്‍ക്കേ വരികയുള്ളുവോ?"  ഇത് അശ്വതിയെ ചൊടിപ്പിച്ചു എന്നും പൌണ്ട്രകവധം ആട്ടക്കഥ എഴുതുവാനിടയായത്‌ അതിനാലാണെന്നും പഴമക്കാര്‍ പറഞ്ഞിട്ടുണ്ട്. 

അശ്വതി തിരുനാള്‍ അന്തരിച്ചു പത്തുവര്‍ഷം കഴിഞ്ഞാണ് കാര്‍ത്തിക തിരുനാള്‍ നാടുനീങ്ങിയത്. ഉള്ളൂരിന്റെ അഭിപ്രായം ഭോജരാജാവ്, ഹര്‍ഷവര്‍ദ്ധനന്‍, കൃഷ്ണദേവരായര്‍, എന്നീ സുപ്രസിദ്ധ ഭാരതീയ രാജാക്കന്മാരുമായി വേണം കാര്‍ത്തിക തിരുനാളിനെ ഉപമിക്കാനെന്നാണ് അദ്ദേഹത്തിന്‍റെ മേല്‍നോട്ടത്തില്‍  വിപുലീകരിച്ച നിരവധി അപൂര്‍വഗ്രന്ഥങ്ങള്‍ സംഭരിച്ചു സൂക്ഷിച്ച വലിയകൊട്ടാരം  ഗ്രന്ഥപ്പുര ഒരു മഹാ- വിജ്ഞാനസാഗരം തന്നെയായിരുന്നുവത്രേ.

കാര്‍ത്തികയുടെയും അശ്വതിയുടെയും കാലത്ത് അഭിനയിച്ചു പേരെടുത്ത നടന്മാരെ പറ്റി ചുരുക്കം ചില വിവരങ്ങളേ ഉള്ളൂ. അവ പത്മനാഭസ്വാമി ക്ഷേത്രത്തിലെ രേഖകളില്‍ നിന്നും ലഭിച്ചതാണ്. ആറന്മുള കാവുക്കാട്‌ ഇരവിപ്പണിക്കര്‍ ,  കൊട്ടാരക്കര ശങ്കരപണിക്കര്‍, തിരുവല്ലാ അയ്യപ്പപണിക്കര്‍, കുളത്തൂര്‍ ത്രിവിക്രമന്‍ ആശാന്‍, മീനച്ചില്‍ ഇട്ടുണ്ടാപ്പണിക്കര്‍  എന്നിവരുടെ പേരുകള്‍ പല തവണകളിലായി ആടിയ ആദ്യാവസാനക്കാരായി  കാണുന്നു. നളചരിതം, സന്താനഗോപാലം (ഇപ്പോള്‍ ആടുന്നതല്ല), കിരാതം, ധ്രുവചരിതം, ജയദ്രഥവധം, രാവണോത്ഭവം (ഇപ്പോള്‍ ആടുന്നതല്ല),  എന്നിവ മറ്റു കഥകളുടെ കൂട്ടത്തില്‍ ആടിയതായി കാണുന്നുണ്ട്. കോട്ടയം കഥകള്‍ AD  1748-നു ശേഷം മാത്രമേ തിരുവനന്തപുരത്ത് ആടിയിട്ടുള്ളൂ.  പക്ഷെ അവ കുറിച്ചിയിലും കിടങ്ങൂരും അതിനു മുന്‍പ് സ്വീകരിച്ചു കഴിഞ്ഞിരുന്നു. 

അശ്വതിതിരുനാള്‍ രചിച്ചഅംബരീഷചരിതം ആട്ടക്കഥയിലെ 

ഒരു സംസ്കൃതശ്ലോകം :

'സോമകോടിസമധാമ കഞ്ചുകിലലാമ
                              മഞ്ചതലമാസ്ഥിതം
ശ്യാമതാമരസദാമകോമളരമാ
                 ദൃഗഞ്ചലകലാഞ്ചിതം
കാമദായകമമോഘമേഘകുല
               കാമാനീയകഹരംപരം
സാമജാമയഹരം  ഹരിം സ മുനി
              രാമനാമ വനമാലിനം.'  


                                                             (ലേഖനം അവസാനിച്ചു)

2012, നവംബർ 16, വെള്ളിയാഴ്‌ച

കാര്‍ത്തികതിരുനാളും അശ്വതിതിരുനാളും (ഭാഗം -4)

(ശ്രീ. എം.കെ.കെ നായര്‍ അവര്‍കളുടെ ലേഖനത്തിന്റെ തുടര്‍ച്ച )

കപ്ലിങ്ങാട്‌ - കാര്‍ത്തിക തിരുനാള്‍ പദ്ധതി പ്രകാരം ഏര്‍പ്പെടുത്തിയ പരിഷ്കാരങ്ങള്‍ ചുരുക്കിപ്പറയാം. ഒന്നാമതായി ആഹാര്യാഭിനയം സുന്ദരതരമാക്കി. ചുട്ടിയുടെ വടിവും വികാസവും പ്രത്യേകം ശ്രദ്ധിക്കപ്പെട്ടതോടു കൂടി തേച്ച വേഷങ്ങള്‍ ആകര്‍ഷകമായി. കത്തിക്കും ചുവപ്പു താടിക്കും മൂക്കിലും നെറ്റിയുടെ നടുവിലും ചുട്ടിപ്പൂവും നല്‍കി. മഹര്‍ഷിക്ക് വെള്ള മനയോലയും മഹര്‍ഷി മുടിയും നല്‍കി. കേശഭാരം സുന്ദര മാക്കി. ഈ പരിഷ്കാരങ്ങളെയെല്ലാം ഉള്‍പ്പെടുത്തിയാണ് കാര്‍ത്തികതിരുനാള്‍ മാത്തൂര്‍ പണിക്കരുടെ നേതൃത്വത്തിലുള്ള കളിയോഗത്തിന്റെ കോപ്പ് പുതുതായി പണിയിച്ചത്.

മഹാരാജാ - നമ്പൂതിരിദ്വയത്തിന്റെ മറ്റൊരു പരിഷ്കാരം കൈമുദ്ര കാണിക്കുന്ന രീതിയെയാണ് ബാധിച്ചത്. മുട്ടുകള്‍ വിടര്‍ത്തി, തോളിന്റെ താനത്തില്‍ പിടിച്ചു മാറിനു നേരേ മുദ്ര കാണിക്കണമെന്നു തീരുമാനിക്കുകയും അതു നടപ്പിലാക്കുകയും ചെയ്തു. 

കോട്ടയം കഥകളുടെ ചിട്ടയില്‍ വലിയ പരിഷ്കരണത്തിനൊന്നും രണ്ടുപേരും തുനിഞ്ഞില്ല.  ചെറിയ പൊടിക്കൈകള്‍ പ്രയോഗിച്ചു എന്നു മാത്രം. എന്നാല്‍ മറ്റു കഥകളുടെ അവതരണത്തില്‍ അതിപ്രധാനമായ പരിഷ്കരണങ്ങളാണ് മഹാരാജാ- നമ്പൂതിരി സംയുക്തം ഏര്‍പ്പെടുത്തിയത്. 

ഉത്ഭവത്തില്‍ രാവണന്റെ തപസ്സാട്ടചിട്ട , നക്രതുണ്ഡിയുടെ ആട്ടവും ചടങ്ങുകളും, ചെറിയ നരകാസുരന്റെ ശൂര്‍പ്പണകാങ്കം, ചെറിയ നരകാസുരന്‍ പത്നിയുമായി  പ്രവേശിക്കുന്ന രീതി, അഴകിയ രാവണന്റെ പ്രവേശം, ആട്ടം, ചിട്ട എന്നിങ്ങനെ. 
മേളത്തിലും പാട്ടിലും പരിഷ്കാരങ്ങള്‍ പലതും ഉണ്ടായി. മഞ്ജുതരയില്‍ ചരണങ്ങള്‍ പല രാഗങ്ങളിലായി പാടുന്നതും അതിനെ തുടര്‍ന്നുള്ള മേളവും കപ്ലിങ്ങാടന്റെ പ്രധാനമായ സംഭാവനയാണ്. 

കാര്‍ത്തികതിരുനാള്‍ മഹാരാജാവിന്റെ രാജശക്തിയായിരുന്നു കപ്ലിങ്ങാടന്റെ പരിഷ്കാരങ്ങള്‍ക്ക് ചിരപ്രതിഷ്ഠ നേടിക്കൊടുത്തത്. നാല്‍പ്പതു വര്‍ഷം ഭരിച്ച കാര്‍ത്തിക തിരുനാളിന് എല്ലാ പരിഷ്കാരങ്ങളും നിര്‍ദ്ദാക്ഷിണ്യം നടപ്പിലാക്കുവാനുള്ള സമയവും സാഹചര്യവും ലഭിച്ചു. അങ്ങിനെയാണ് കത്തിവേഷം കഥകളിയിലെ സര്‍വപ്രധാന വേഷമായി തീര്‍ന്നതും രാഘവപിഷാരടിയുടെ രാവണോത്ഭവവും കല്ലൂര്‍ നമ്പൂതിരിപ്പാടിന്റെ കാര്‍ത്തവീരവിജയവും എല്ലാം പ്രചാരപ്പെട്ടതും. പില്‍ക്കാലത്ത് ഇരയിമ്മന്‍തമ്പിയുടെ കീചകവധവും ഉത്തരാസ്വയംവരവും കരീന്ദ്രന്‍ കോയിതമ്പുരാന്റെ രാവണവിജയവും കൂടിയായപ്പോള്‍ കത്തിവേഷം നടന്മാരുടെ സ്വപനമായിത്തീര്‍ന്നു. 

കാര്‍ത്തികതിരുനാളും കപ്ലിങ്ങാട്‌ നമ്പൂതിരിയും ഒത്തുചേര്‍ന്നാണ് എല്ലാ പരിഷ്കാരങ്ങളും നടപ്പില്‍ വരുത്തിയതെങ്കിലും ആ പരിഷ്കൃത സമ്പ്രദായം പില്‍ക്കാലത്ത് അറിയപ്പെട്ടത് കപ്ലിങ്ങാടന്‍ സമ്പ്രദായം അഥവാ കപ്ലിങ്ങാടന്‍ ചിട്ട എന്നാണ് . അതിനു കാരണഭൂതന്‍ മഹാരാജാവ് തന്നെയായിരുന്നുവത്രേ. അദ്ദേഹം കളിയോഗത്തിലെ ആശാന്മാര്‍ക്ക് നിര്‍ദ്ദേശം നല്‍കുമ്പോഴെല്ലാം കപ്ലിങ്ങാടന്‍ ചിട്ട ശുദ്ധമായി പാലിക്കണമെന്നാണുപോലും  പറഞ്ഞിരുന്നത്. സംസ്കൃത ചിത്തനായ അദ്ദേഹത്തിന്‍റെ മഹാമനസ്കത കേള്‍വിപ്പെട്ടതാണല്ലോ. 

കപ്ലിങ്ങാടന്‍ സമ്പ്രദായം തിരുവിതാംകൂറില്‍ അരക്കിട്ടുറപ്പിച്ചതു പില്‍ക്കാലത്ത് പ്രശസ്തരായ കണ്ടത്തില്‍ നാരായണ മേനോനും  നളനുണ്ണിയും ആയിരുന്നു.  കല്ലുവഴി സമ്പ്രദായത്തിന്റെ ഉപജ്ഞാതാവായ ഇട്ടിരാരിശമേനോനെ  ചൊല്ലിയാടിക്കുവാന്‍ ഒളപ്പമണ്ണ അപ്പന്‍ നമ്പൂതിരിപ്പാട്‌ ഉത്രം തിരുനാള്‍ മഹാരാജാവിന്റെ അനുമതിയോടുകൂടി നളനുണ്ണിയെ ഇല്ലത്തുവരുത്തി. നളന്റെ ഭാഗം ചൊല്ലിയാടിക്കുവനാണ് ഉദ്ദേശിച്ചതെങ്കിലും നളനുണ്ണിയുടെ സുഭാദ്രാഹരണത്തിലെ അര്‍ജുനന്റെ പതിഞ്ഞ പദം  കണ്ടു ആകൃഷ്ടനായ നമ്പൂതിരിപ്പാട്‌ ഇട്ടിരാരിശമേനോനെ ആ പദമാണ്‌ ആദ്യം ചൊല്ലിയാടിച്ചത്. ഇന്നും നളനുണ്ണിയുടെ ആ ചിട്ടയാണ് കല്ലുവഴി സമ്പ്രദായത്തില്‍ പാലിച്ചു കാണുന്നത്. നെടുമുടി തകഴി എന്നീ പ്രദേശങ്ങളിലാണ് കറയറ്റ കപ്ലിങ്ങാടന്‍ സമ്പ്രദായം കേടുകൂടാതെ പരിപാലിച്ചു വന്നത്. കപ്ലിങ്ങാടന്‍ സമ്പ്രദായം കടത്തനാട്ടും കാവുങ്ങല്‍ കളരിയിലും കാലതാമസം കൂടാതെ പ്രവേശിച്ചു. ആ കളരിയില്‍ കാണുന്ന സമ്പ്രദായം തകഴി ചിട്ടയുമായി അല്‍പ്പസ്വല്‍പ്പം വ്യത്യാസങ്ങള്‍ ഉള്ളതാണ്. ദേശീയമായ രുചിഭേദം കൊണ്ടുവന്ന മാറ്റങ്ങള്‍ ആയിരിക്കാം അവ. കപ്ലിങ്ങാടന്‍ സമ്പ്രദായം കേടുകൂടാതെ നിലനിര്‍ത്തിയത് അമ്പലപ്പുഴ കര്‍ത്താവും കുറിച്ചി കിട്ടന്‍ പിള്ളയും തകഴി കേശവ നെടുമുടി തകഴി എന്നീ പ്രദേശങ്ങളിലാണ് കറയറ്റ കപ്ലിങ്ങാടന്‍ സമ്പ്രദായം കേടുകൂടാതെ പരിപാലിച്ചു വന്നത്. കപ്ലിങ്ങാടന്‍ സമ്പ്രദായം കടത്തനാട്ടും കാവുങ്ങല്‍ കളരിയിലും കാലതാമസം കൂടാതെ പ്രവേശിച്ചു. ആ കളരിയില്‍ കാണുന്ന സമ്പ്രദായം തകഴി ചിട്ടയുമായി അല്‍പ്പസ്വല്‍പ്പം വ്യത്യാസങ്ങള്‍ ഉള്ളതാണ്. ദേശീയമായ രുചിഭേദം കൊണ്ടുവന്ന മാറ്റങ്ങള്‍ ആയിരിക്കാം അവ. 

കപ്ലിങ്ങാടന്‍ സമ്പ്രദായം കേടുകൂടാതെ നിലനിര്‍ത്തിയത് അമ്പലപ്പുഴ കര്‍ത്താവും കുറിച്ചി കിട്ടന്‍ പിള്ളയും തകഴി കേശവപ്പണിക്കരുമായിരുന്നു. ഭീമന്‍ കേശവപ്പണിക്കര്‍ എന്നാണ് പണിക്കര്‍ അറിയപ്പെട്ടിരുന്നത്. ഇന്ന് നാം കാണുന്ന രൌദ്രഭീമന്റെ തേപ്പ് നിര്‍ണ്ണയിച്ചത് കേശവപ്പണിക്കരായിരുന്നു. അദ്ദേഹത്തിന്‍റെ വത്സല ശിഷ്യനായ ഗുരു.ചെങ്ങന്നൂര്‍ രാമന്‍പിള്ളയാണ്  കപ്ലിങ്ങാട്‌ സമ്പ്രദായത്തിലെ അവസാന കണ്ണി. കഴിഞ്ഞ (1980)നവംബര്‍ 28- നു സ്വര്‍ഗ്ഗാരോഹണം  ചെയ്ത രാമന്‍ പിള്ള കപ്ലിങ്ങാടന്‍ സമ്പ്രദായം അദ്ദേഹത്തിന്‍റെ ശിഷ്യരിലേക്ക് പകര്‍ന്നു കൊടുത്തിട്ടുണ്ട്. ആ സമ്പ്രദായപ്രകാരം  ഇന്നു നടന്നുവരുന്ന പകല്‍കുറി കളരിയില്‍ രാമന്‍പിള്ളയുടെ പ്രശസ്ത ശിഷ്യനായ മടവൂര്‍ വാസുദേവന്‍‌ നായരുടെ നേതൃത്വത്തിലാണ് അഭ്യസനം നടക്കുന്നത്. 
                                                                 
                                                                      (തുടരും)

2012, നവംബർ 7, ബുധനാഴ്‌ച

കാര്‍ത്തികതിരുനാളും അശ്വതിതിരുനാളും (ഭാഗം -3)

(ശ്രീ. എം.കെ.കെ നായര്‍ അവര്‍കളുടെ ലേഖനത്തിന്റെ തുടര്‍ച്ച )

മാര്‍ത്താണ്ഡവര്‍മ്മയുടെ കാലത്തു തന്നെ A D.1744-ല്‍  തിരുവനന്തപുരത്തു പത്മനാഭസ്വാമി ക്ഷേത്രത്തില്‍ വെച്ച് കൃഷ്ണാര്‍ജുനസംവാദം, സുഭദ്രാഹരണം, ഗുരുദക്ഷിണ, സന്താനഗോപാലം, ശംബരവധം, ബാല്യുദ്ഭവം, എന്നീ കഥകള്‍ അഭിനയിക്കപ്പെട്ടു.  1754- ലാണ് നളചരിതം രണ്ടാം ദിവസം ആടിയത്. 1647 -ല്‍ പല കഥകളും ആടിയെങ്കിലും പ്രധാനമായി കിരാതം, ധൃവചരിതം, രാവണോല്‍ഭവം എന്നിവയായിരുന്നു. ഈ  രാവണോല്‍ഭവം പിന്നീട് ആടിയതായി അറിവില്ല. അങ്ങിനെ കാര്‍ത്തിക തിരുനാള്‍ രാജ്യഭാരം ഏറ്റപ്പോള്‍ തിരുവനന്തപുരത്തെ അന്തരീക്ഷം കഥകളിയാല്‍ മുഖരിതമായിരുന്നു എന്നതില്‍ സംശയം ഇല്ല. ഉണ്ണായിവാര്യരും കുഞ്ചന്‍ നമ്പ്യാരും കൂടാതെ ഇട്ടിരാരിശമേനോന്‍ (സന്താനഗോപാലവും  രുഗ്മാംഗാദചരിതവും  രചിച്ച കവി), പുതിയിക്കല്‍ തമ്പാന്‍ (കാര്‍ത്തവീര്യാര്‍ജുനവിജയം,  രാമാനുകരണം ഇവയുടെ രചയിതാവ്  ), അശ്വതി തിരുനാള്‍ (ഇളയ തമ്പുരാന്‍ ), ഇരട്ടക്കുളങ്ങര വാര്യര്‍ (കിരാതകര്‍ത്താവ് ), ഇടവക്കാട് നമ്പൂതിരിമാര്‍, കിളിമാനൂര്‍ രവിവര്‍മ്മ കോയിത്തമ്പുരാന്‍ (കംസവധം രചിച്ച കവി) മുതലായ പ്രശസ്ത വിദ്വാന്മാര്‍ കാര്‍ത്തികതിരുനാളിന്റെ സദസ്യരായിരുന്നു.

കാര്‍ത്തികതിരുനാള്‍ ഏഴ് ആട്ടക്കഥകള്‍ രചിച്ചു. രാജസൂയം (തെക്കന്‍), സുഭദ്രാഹരണം , ബകവധം , ഗന്ധര്‍വവിജയം, പാഞ്ചാലീസ്വയംവരം, കല്യാണസൌഗന്ധികം എന്നിവയാണ് ആ കൃതികള്‍. കത്തിവേഷത്തിന്റെ സാദ്ധ്യതകള്‍ മുന്‍നിര്‍ത്തി വീരരസപ്രൌഡി  തികഞ്ഞ ഒരു കഥാപാത്രമായിട്ടാണ് കാര്‍ത്തികതിരുനാള്‍ രാജസൂയത്തില്‍ ജരാസന്ധനെ അവതരിപ്പിച്ചത്.  
പിന്നീടുണ്ടായതും ഉത്തരകേരളത്തില്‍  പ്രചാരപ്പെട്ടതുമായ വടക്കന്‍ രാജസൂയത്തില്‍ ജരാസന്ധന്‍ താടിയാണ്. 
രാജസൂയം കഥയിലെ പ്രതിനായകന്മാര്‍ ജരാസന്ധനും ശിശുപാലനും ആണ്.  രണ്ടും ശക്തരായ  രാജാക്കന്മാരാണ് എങ്കിലും ജരാസന്ധനാണ് ചക്രവര്‍ത്തി.  ശിശുപാലന്‍ താരതമ്യേന അത്രശക്തനോ പ്രാഭാവശാലിയോ അല്ല. അതാണ്‌ കാര്‍ത്തികതിരുനാള്‍  'ഗോത്രനാഥന്മാരെല്ലാം അത്രവന്നു വണങ്ങുന്ന' ജരാസന്ധനെ കത്തിയിലവതരിപ്പിച്ചത്.

നരകാസുരവധം മുഴുവനും കാര്‍ത്തികതിരുനാളല്ല എഴുതിയത് എന്നാണ് കേള്‍വി. 'അര്‍ണോജാക്ഷികളെ ഹരിച്ചൊരു നിന്‍ കര്‍ണ്ണ നാസികാ- കുചകൃന്തനമിഹ തുര്‍ണ്ണം ചെയ് വന്‍ കണ്ടു കൊള്‍ക നീ' എന്ന പദം ഇത്രയുമായപ്പോള്‍ ആശയം തീര്‍ന്നു പോയി. നാലാമത്തെ വരി പിന്നെ പൂരിപ്പിക്കാം എന്നു വിചാരിച്ചു കാര്‍ത്തിക തിരുനാള്‍ ഓലയും നാരായവും വെച്ചിട്ടു പോയി എന്നും, അശ്വതി തിരുനാള്‍ അതു നോക്കിയശേഷം 'നിര്‍ണ്ണയമതിനുണ്ടുമേ കരാളേ' എന്നെഴുതി ചേര്‍ത്തുവെന്നും അതുകണ്ടു സന്തുഷ്ടനായ മഹാരാജാവ് അദ്ദേഹത്തോട്  'ഇന്നിശേഷം അപ്പന്‍ എഴുതിയാല്‍ മതി എന്നു പറഞ്ഞതിനാല്‍ നരകാസുരവധം കഥ മുഴുവനാക്കിയത് അശ്വതി ആയിരുന്നു എന്നാണ് ഐതിഹ്യം. ഏതായാലും നരകാസുരവധം ആട്ടക്കഥയിലെ  ഉത്തര  ഭാഗത്തിന്റെ ശൈലി പൂര്‍വഭാഗത്തെ അപേക്ഷിച്ചു വളരെ വ്യത്യസ്ഥമായിരിക്കുന്നതിനാല്‍ ഈ ഐതിഹ്യത്തില്‍ കഴമ്പുണ്ടായിരിക്കണം.

കാര്‍ത്തികതിരുനാള്‍ സുഭദ്രാഹരണം രചിച്ചു എങ്കിലും പ്രചാരപ്പെട്ടത്‌ മന്ത്രേടത്തു നമ്പൂതിരിയുടെ കൃതിയാണ്.  കോട്ടയത്തു തമ്പുരാന്റെ കൃതികള്‍  ബകവധവും കല്യാണസൌഗന്ധികവും ഉണ്ടായിരുന്നതിനാല്‍ കാര്‍ത്തികയുടെ കൃതികള്‍ ആരും ആടാന്‍ ഒരുമ്പെട്ടില്ല. കോട്ടയം തമ്പുരാന്റെ കൃതികളെ അപേക്ഷിച്ച് കാര്‍ത്തികയുടെ കൃതികള്‍ കൂടുതല്‍ ലളിതവും സംഗീത മധുരവും ആണെങ്കിലും ചിട്ടപ്പെടുത്തി ഉറപ്പിച്ചു കഴിഞ്ഞ കോട്ടയം കൃതികളെ അവയ്ക്കു സ്ഥാനഭ്രംശം ചെയ്യാന്‍ കഴിഞ്ഞില്ല. മഹാരാജാവുമായി വളരെ അടുത്ത ആശ്രിതബന്ധം പുലര്‍ത്തിയിരുന്ന കപ്ലിങ്ങാട്‌ നമ്പൂതിരിയോടു കല്യാണസൌഗന്ധികം ചൊല്ലിയാടിക്കുവാന്‍ ആവശ്യപ്പെട്ടു എങ്കിലും അദ്ദേഹം അതില്‍ നിന്നൊഴിയുകയായിരുന്നു ചെയ്തത്. മഹാമനസ്കനായ കാര്‍ത്തികയ്ക്ക് അതുകൊണ്ട് കുണ്ടിതമോ  പരിഭവമോ ഉണ്ടായില്ല. കാര്‍ത്തിക തിരുനാളിന്റെ മറ്റു ആട്ടക്കഥകള്‍ പില്‍ക്കാലത്ത് പ്രചാരപ്പെട്ടില്ല. എന്നാല്‍ അദ്ദേഹത്തിന്‍റെ രാജസൂയവും നരകാസുരവധവും ഇന്നും പുതുമയോടെ ആടിവരുന്നുണ്ട്. 

കാര്‍ത്തികതിരുനാളിന്റെ കാലത്താണ് കഥകളിക്ക് ഏറ്റവും പ്രസ്താവ്യമായ പരിഷ്കാരങ്ങള്‍ ഉണ്ടായത്. അക്കാലത്തു തലപ്പള്ളി താലൂക്കിന്റെ വടക്കുഭാഗത്തുള്ള നെടുമ്പുര ഗ്രാമത്തില്‍ കപ്ലിങ്ങാട്‌ ഇല്ലത്തില്‍ നാരായണനെന്നു പേരായി ഒരു നമ്പൂതിരി ജനിച്ചു. ആ ഉണ്ണിയുടെ അച്ഛന് വേളികൂടാതെ ദേശമംഗലത്തു വാര്യത്ത് സംബന്ധവുമുണ്ടായിരുന്നു. അന്തര്‍ജ്ജനവും വാര്യസാരും ഒരേ സമയം ഗര്‍ഭവതികളായത്രേ. അച്ഛന്‍ നമ്പൂതിരി നല്ല കുട്ടികള്‍ ഉണ്ടാവാനായി ദിവസവും വെണ്ണ രണ്ടായി വെവ്വേറെ ജപിച്ചു അന്തര്‍ജ്ജനത്തെ ഏല്‍പ്പിക്കും. ഒന്ന് അവര്‍ക്കും ഒന്ന് വാര്യസാര്‍ക്കും വേണ്ടിയായിരുന്നു. രണ്ടുപേരും അടുത്തടുത്തു പ്രസവിച്ചു. വാര്യസാരുടെ കുട്ടി ഗ്രന്ഥപഠനത്തില്‍ അതീവ തല്‍പ്പരനായി. ഉണ്ണിനമ്പൂതിരിയാകട്ടെ പാട്ടിലും കൊട്ടിലുമാണ്  ആകര്‍ഷിതനായത്. നമ്പൂതിരിക്ക് വാര്യസാരില്‍ കൂടുതല്‍ താല്‍പ്പര്യം ഉണ്ടെന്നു ശങ്കിച്ച അന്തര്‍ജ്ജനം തനിക്കു നിശ്ചയിച്ചിരുന്ന വെണ്ണ കൂടി  വാര്യസാര്‍ക്ക് ദിവസവും കൊടുത്തിരുന്നുവത്രേ. ഐതിഹ്യം ശരിയായിരിക്കാം, അല്ലായിരിക്കാം. കപ്ലിങ്ങാട്‌ നമ്പൂതിരി അനുഗ്രഹീതനായ ഒരു താളമേളസംഗീത വിദഗ്ദനും നാട്യ കലയില്‍ അസാധാരണ വിദ്വാനുമായിരുന്നു. എന്നത് ചരിത്ര വാസ്തവമാണ്. ആ വാര്യരുകുട്ടിയാണ് ദേശമംഗലത്ത് ഉഴുത്രവാര്യര്‍  എന്നു പ്രശസ്തനായിതീര്‍ന്ന ശാസ്ത്രജ്ഞന്‍. കുഞ്ഞിട്ടി രാഘവന്‍ നമ്പ്യാര്‍, മനോരമ തമ്പുരാട്ടി, കല്ലൂര്‍ നമ്പൂതിരിപ്പാട്‌ എന്നിവരുടെ ഗുരുവായിരുന്നു വാര്യര്‍. 

കാര്‍ത്തിക തിരുനാള്‍ മഹാരാജാവിന്റെ നാട്യ കലാപ്രേമം മനസിലാക്കിയ കപ്ലിങ്ങാട്‌ നമ്പൂതിരി അദ്ദേഹത്തെ മുഖം കാണിച്ചു. അന്നുമുതല്‍ കൊട്ടാരത്തില്‍ തന്നെ താമസിച്ചു മഹാരാജാവുമായി ഒത്തുചേര്‍ന്ന് ഒരു കഥകളി പരിഷ്കരണയജ്ഞം തുടങ്ങി. അന്ന് നടപ്പിലിരുന്നത്‌ കല്ലടിക്കോടന്‍ സമ്പ്രദായമായിരുന്നു. ആ സമ്പ്രദായത്തെ ഉടച്ചു വാര്‍ക്കുകയായിരുന്നു കപ്ലിങ്ങാടന്റെ സംരംഭം. വേഷം, രസാഭിനയം, നൃത്തം, പാട്ട് , മേളം എന്നിങ്ങനെ കഥകളിയുടെ എല്ലാ വശങ്ങളിലും കപ്ലിങ്ങാടന്റെയും കാര്‍ത്തിക തിരുനാളിന്റെയും സംയുക്ത പ്രതിഭ ആവരണം ചെയ്തു.  ഈ മഹാ   സംരഭത്തില്‍ പങ്കെടുത്ത മഹാരഥന്മാര്‍ ഇട്ടീരിപ്പണിക്കര്‍,  കൃഷ്ണപ്പണിക്കര്‍, ഉണ്ണീരിപ്പണിക്കര്‍ എന്ന മഹാനടന്മാര്‍  ആയിരുന്നു.       സൌഗന്ധികത്തില്‍ ഹനുമാന്റെ ചിട്ട 
അവതരിപ്പിച്ചത്  ഇട്ടീരിപ്പണിക്കാരാണ്.   

                                                                          (തുടരും )

2012, നവംബർ 1, വ്യാഴാഴ്‌ച

കാര്‍ത്തികതിരുനാളും അശ്വതിതിരുനാളും (ഭാഗം -2)




(ശ്രീ.എം.കെ.നായര്‍ അവര്‍കളുടെ ലേഖനത്തിന്റെ തുടര്‍ച്ച) 

പില്‍ക്കാലത്ത് മാത്തൂര്‍ കളിയോഗത്തിന്റെ നിലവാരം ക്ഷയിക്കുകയാല്‍ ഉത്രം തിരുനാള്‍ മഹാരാജാവ് വലിയകൊട്ടാരം വകയായി ഒരു കളിയോഗം രൂപീകരിക്കുകയും ഉത്സവക്കളി  ആ കളിയോഗത്തെ ഏല്‍പ്പിക്കുകയും ചെയ്തു. എങ്കിലും മാത്തൂര്‍ കളിയോഗം വടക്കേ നടയില്‍ ആടാറുണ്ടായിരുന്നു. കിഴക്കേ നടയില്‍ നടക്കുന്ന കളിക്ക് ദൃഷ്ടിദോഷം വരാതിരിക്കാനാണോ എന്ന് തോന്നും ആ വടക്കേ നട ആട്ടം കണ്ടാല്‍. 

മാര്‍ത്താണ്ഡവര്‍മ്മയുടെ സദസ്സില്‍ ഉണ്ണായിവാര്യരും , കുഞ്ചന്‍നമ്പ്യാരും ഉണ്ടായിരുന്നു. മാര്‍ത്താണ്ഡവര്‍മ്മയുടെ മരണത്തിനു മുന്‍പു തന്നെ ഉണ്ണായിവാര്യര്‍ നളചരിതം രചിച്ചിരുന്നു. നാലു ദിവസത്തെ കഥയാണെങ്കിലും ആദ്യമായി ചൊല്ലിയാടിച്ചത് രണ്ടാം ദിവസം മാത്രമാണ്. ഇന്നും കളരികളില്‍ രണ്ടാം ദിവസം മാത്രമേ അഭ്യാസ പരിപാടിയായി ചൊല്ലിയാടാറുള്ളൂ.
മാര്‍ത്താണ്ഡവര്‍മ്മയുടെ കാലത്ത് തിരുവനന്തപുരത്ത് കഥകളി പ്രചാരത്തിലുണ്ടായിരുന്നു. കാര്‍ത്തിക തിരുനാള്‍ ആ കലാരൂപത്തില്‍ വളരെ പ്രതിപത്തി കാണിക്കുകയും ചെയ്തിരുന്നു. കളിയോഗങ്ങള്‍ വന്നു കളിയരങ്ങുകള്‍ നടത്തുക എന്നല്ലാതെ സ്ഥിരമായി ചില സന്ദര്‍ഭങ്ങളില്‍ ആട്ടം ആടുന്ന പതിവുണ്ടായിരുന്നില്ല. കിടങ്ങൂര്‍, കുറിച്ചി എന്നീ പ്രദേശങ്ങളിലായിരുന്നു കളരികള്‍ ചിട്ടയായി പ്രവര്‍ത്തിച്ചിരുന്നത്. ആ കളിയോഗങ്ങള്‍ തിരുവനന്തപുരത്തു വന്ന് ആടിയിരുന്നു. കുറിച്ചിയിലെ ഒരു ആശാനാണ് നളചരിതം രണ്ടാം ദിവസം സംവിധാനം ചെയ്തതും ചൊല്ലിയാടിച്ചതും, മാര്‍ത്താണ്ഡവര്‍മ്മയുടെ മുന്‍പില്‍ അരങ്ങേറ്റം നടത്തിയതും.  

                                                         
അന്നുണ്ടായിരുന്ന കഥകളിയുടെ ഒരു ഏകദേശ രൂപം മനസിലാക്കുന്നതു നന്നായിരിക്കും. 
കൊട്ടാരക്കരയില്‍നിന്നും വെട്ടത്തു നാട്ടിലേക്കു പോയ സംഘം പാളക്കിരീടവുംനീലത്തേപ്പും ചില ഉടയാടകളുമാണ് സ്വീകരിച്ചിരുന്നത്.  നടന്മാര്‍ തന്നെ പദങ്ങള്‍ പാടിആടിയിരുന്നു. മദ്ദളവും ഇലത്താളവും മാത്രമേ മേളമായിട്ടുണ്ടായിരുന്നുള്ളൂ. വെട്ടത്തു തമ്പുരാന്‍ സാരമായ പരിഷ്കാരങ്ങള്‍ വരുത്തി , മുഖത്തു ചുട്ടിയും ധീരോദാത്ത നായകര്‍ക്കു പച്ചയും ധീരോദ്ധതര്‍ക്ക് കൂടിയാട്ടത്തിലെ കത്തിയും നിശ്ചയിച്ചു. മേളത്തിനു ചെണ്ടയും ചേര്‍ത്തു. തോരണയുദ്ധം ചൊല്ലിയാടുമ്പോള്‍ രാവണന്റെ വേഷത്തിന് അസാമാന്യനായ നടനെയാണ് കിട്ടിയത്. അയാള്‍ക്ക്‌ വിക്കുണ്ടായിരുന്നതിനാല്‍ പദങ്ങള്‍ പാടാന്‍ വിഷമമായി. മാത്രമല്ല, വെട്ടത്തു തമ്പുരാന്‍ കലാശം ചിട്ടപ്പെടുത്തിയപ്പോള്‍ കളരിപ്പയറ്റില്‍ അഭ്യസിച്ച് ഊറ്റം വെച്ച നടന്മാരെയാണ് ഉപയോഗിച്ചത്. കലാശങ്ങള്‍ എടുത്തു കഴിഞ്ഞപ്പോള്‍ നടന്മാര്‍ക്കു പദം പാടാന്‍ ശ്വാസം ശരിയാവാതെയായി. അങ്ങിനെയാണ് ശ്ലോകങ്ങളും പദങ്ങളും പാടാന്‍ വെട്ടത്തു തമ്പുരാന്‍ ഒരു പാട്ടുകാരനെ പിന്നില്‍ നിര്‍ത്തി ഇലത്താളവും കൊടുത്തത്.  

കോട്ടയം തമ്പുരാന്‍ ആട്ടത്തിന്റെ ഉള്ളടക്കത്തിലും നാട്യധര്‍മ്മി അനുസരിച്ചുള്ള രീതികളിലുമാണ് ശ്രദ്ധ ചെലുത്തിയത്. തോടയം,പുറപ്പാട്, മഞ്ജുതര മുതലായവയെല്ലാം അദ്ദേഹത്തിന്‍റെ സംഭാവനകളാണ്. വെട്ടത്തു തമ്പുരാന്‍ അവതരിപ്പിച്ചിരുന്ന തിരനോട്ടം കോട്ടയം തമ്പുരാന്‍ ഭാവോദ്ദീപകമാക്കി. രാമായണ കഥാരംഗങ്ങളില്‍ നാടകീയതയും ഭാവോല്‍ക്കടതയും കുറവായതിനാലാണ് കോട്ടയം അതെല്ലാം അത്ഭുതകരമാം വിധത്തില്‍ നിറഞ്ഞിരുന്ന ഭാരതകഥയെ ആസ്പദമാക്കി ആട്ടക്കഥകള്‍ രചിച്ചത്. രചിക്കുക മാത്രമല്ല കഥകളിയുടെ അടിത്തറയായി അവ എന്നും നിലനിലക്കത്തക്ക വിധത്തില്‍ അവയ്ക്ക് ചിട്ടകള്‍ നിര്‍ദ്ദേശിക്കുകയും നിര്‍ദ്ദാക്ഷിണ്യം അവയെ അദ്ദേഹം നടപ്പില്‍ വരുത്തുകയും ചെയ്തു. കല്ലടിക്കോട്ടു പ്രദേശത്തു കറതീര്‍ന്ന ആ സമ്പ്രദായം കല്ലടിക്കോടന്‍ എന്നപേരില്‍ കേരളത്തിന്റെ മറ്റു ഭാഗങ്ങളില്‍ പ്രചാരപ്പെടുകയും കിടങ്ങൂര്‍, കുറിച്ചി മുതലായ കളരിയോഗങ്ങള്‍ ആ സമ്പ്രദായത്തെ സ്വീകരിക്കുകയും ചെയ്തു. കാലക്രമേണ കിടങ്ങൂരും കുറിച്ചിയും ആ സമ്പ്രദായത്തില്‍ കാലോചിതമായ ചില പരിഷ്കാരങ്ങള്‍ ഏര്‍പ്പെടുത്തുകയും ചെയ്തു. അങ്ങിനെ കുറിച്ചിക്കാര്‍ അവതരിപ്പിച്ച ഒരു പരിഷ്കാരം രണ്ടു പാട്ടുകാരെ നിയോഗിക്കുക എന്നതായിരുന്നു. ഒന്നാമന്‍ ചേങ്കില കൊട്ടി പാടുകയും രണ്ടാമന്‍ ഇലത്താളം കൊണ്ടു മേളക്കൊഴുപ്പു നല്‍കി ഏറ്റുപാടുകയും ചെയ്തു തുടങ്ങിയത് കുറിച്ചിയിലാണ്. അതോടുകൂടി കഥകളിയില്‍ പൊന്നാനിയും ശങ്കിടിയും സ്ഥലം പിടിച്ചു.

കുറിച്ചിക്കാരുടെ പരിഷ്കരണം കൂടി ഉണ്ടായശേഷമാണ്   മാര്‍ത്താണ്ഡവര്‍മ്മയുടെ  മുന്‍പില്‍ ഉണ്ണായിവാര്യരുടെ നളചരിതം രണ്ടാംദിവസം അരങ്ങേറിയത്. അതേസമയം കിടങ്ങൂര്‍ കളരി മറ്റൊരു കാര്യത്തില്‍ ശ്രദ്ധ ചെലുത്തിയിരുന്നു. കിടങ്ങൂരും പരിസരങ്ങളിലും കൂടിയാട്ടം പ്രചാരപ്പെട്ടിരുന്നു. കൂടിയാട്ടത്തില്‍ കത്തിവേഷത്തിനുള്ള പ്രത്യേകത അവരെ ആകര്‍ഷിച്ചു. കത്തിവേഷം അഭിനേതാവിന്റെ ദൃഷ്ടിയില്‍ അസാധാരണമായ സാദ്ധ്യതകള്‍ ഉള്ളതാണെന്നു കാണുകയാല്‍ കിടങ്ങൂര്‍ ആശാന്മാര്‍ ഖരവധം, തോരണയുദ്ധം മുതലായവ പ്രത്യേകം ശ്രദ്ധിച്ചു. ശൂര്‍പ്പണകാങ്കം  മുതലായവയ്ക്ക് പ്രത്യേകമായ പരിഗണനയുണ്ടാക്കി.കോട്ടയം കഥകളില്‍ കത്തി വേഷത്തിനു വലിയ പ്രാധാന്യം കല്‍പ്പിചിട്ടില്ലാതിരുന്നതിനാല്‍ കിടങ്ങൂര്‍ കളരിയില്‍ ചിട്ട ചെയ്തു മിനുക്കിയെടുത്ത കത്തി വേഷങ്ങള്‍ എല്ലാം രാമായണം കഥകളിലെ മാത്രമായിരുന്നു. കിടങ്ങൂര്‍ കളിയോഗം കൊച്ചിയിലും തിരുവിതാംകൂറിലും സഞ്ചരിച്ച് അനവധി കളിയരങ്ങുകള്‍ നടത്തുകയുണ്ടായി. അങ്ങനെ തൃപ്പൂണിത്തുറയിലും തിരുവനന്തപുരത്തും കിടങ്ങൂര്‍ക്കാരുടെ ഖരനും രാവണനും കഥകളി രംഗത്തു ശക്തമായ ചില തരംഗങ്ങള്‍ ഇളക്കിവിട്ടു. കഥകളിയുടെ ചരിത്രത്തില്‍ ഒരു സുപ്രധാനമായ വഴിത്തിരിവിന് ആ തരംഗങ്ങള്‍ മാര്‍ഗ്ഗനിര്‍ദ്ദേശം നല്‍കി. വാര്യരുടെ നളചരിതത്തോടുകൂടി ഋതുമതിയായിത്തീര്‍ന്ന കഥകളി ബാലിക നവോഢയായത്‌ അടുത്ത അറുപതു കൊല്ലങ്ങള്‍ കൊണ്ടാണ്.

ബാലിവിജയം, രാവണോത്ഭവം, കാര്‍ത്തവീര്യവിജയം, നരകാസുരവധം, രാജസൂയം, കീചകവധം, ഉത്തരാസ്വയംവരം, രാവണവിജയം  എന്നീ എട്ടു കഥകളാണ് കഥകളിയെ പരിപുഷ്ടയാക്കിയത്.  
                                                                         (തുടരും)